Read Uab Meto AMSAL 30 Bible Online

AMSAL 30 - Uab Meto bible

AMSAL 30

¹Le i uab-uab le Nai Agur Nai Yake in anah na'ko Masa: “Au uhaebok, koi Uisneno, au uhaebok! Au be'ik au matanik nane oke anfini!

²Au monok onle mu'it; au ka mu'i fa nek hine.

³Au ka unoina it fa hine, akleo amsa au ka uhin fa Uisneno.

⁴Mansian le me ka in sae nit ma ansanu nit neno tunan? Nabe'i ka in anpoh anin anbi in niman nanan, ma in amu oe anbi in sobalu in nanan, ai anlek pah pinan in tu'an? In le nane sekau, ma in anah nane sekau? Oni ho muhin in!

⁵Uisneno natis In fef bela. In fani ben aninit neu ale atoni le nem ma nahaoftok anbi In.

⁶Leka hom sato amteni sa' le In na'uab nani, In of nabokan ko ma naton nak ho apoiba ko.”

⁷“Koi Uisneno, au toti neu Ko nahun na'ko au fe ka mate fa, amfe neu kau lasi nono nua le i:

⁸He nati' kais talantia au umolok uab amle'ut ma poi, ma kais mufetin kau he au amamu'it kau ai au amu'it kau. Amfe neu kau sa' le au ami.

⁹Natuin, leka au fani on amu'it, oni of au umolok ak au ka lomi Ko fa. Ma leka au fani on amamu'it, oni of au ubak talantia au ule'un Ho kanam.”

¹⁰Kais mukle'uf ate mese anbi in tuan matan, natuin of ansupan ko ma nasanab ko.

¹¹Anmu'i atoni le ansupan in amaf ma ka naupab fa in ainaf.

¹²Anmu'i atoni le nabain'on anfani atoni knino mes in asanat kun.

¹³Anmu'i atoni le natenab nak in aon leko kun — naleko nes kun!

¹⁴Anmu'i atoni le nami in monin neki bulalut; sin namaunu ma nasusu' atoni amanukat ma atoni a'olet.

¹⁵Lake anmu'i ana nua; sin kanan nak “Neu kau”! Anmu'i lasi nono ha le kan len nit fa esle':

¹⁶paha toni amates, bife le ka nahoni fa, afu ametos le anmeno oe ulan piut, ma ai le anpin ma anlami anbi me-me.

¹⁷Atoni le nakle'at in amaf ma in ainaf le namnasi, in of mapolin neu mone he nati' kol ka' anlo'i nani in matan ma kakatasi panis nah nani in nitun.

¹⁸Anmu'i lasi nono ha le mafen le'uf neu he nati' au uhin:

¹⁹kakatasi panis naplel anbi neno atnanan, kaun koko le in nonok anbi fatu putun in tunan, bnao in nao natuin oe tasi in fafon, ma munif atoni ma bife pasnes le anmaliabok.

²⁰Bife le ka na'ki fa neu in mone in lanan esle' i: Leka in mapaisa nalali te in anbukae oke te in nose in lulun ma in nak, “Au ka mo'e fa sa'-sa'!”

²¹Anmu'i lasi nono ha le anmafen he masimo anbi pah pinan funam natef esle':

²²ate mese le anfani kesel, atoni amonot mese le napeni ale sa' le in ansali,

²³bife le atoni kan lomi fa mes napeni in mone, ate bife mese nasik nan kato in atoko.

²⁴Anbi pah pinan le i anmu'i mu'it abaut masaf ha mes nahin anfin kun esle':

²⁵Kiba ai sabuit, mu'it le ka nabe'i fa, mes nabuab in mnahat anbi fauknais.

²⁶Faif tasi, mu'it a'olet, mes anmo'e in ume anbi tub fatu.

²⁷Lamat, le kan mu'i fa kesel, mes sin nalalo'ok nok alekot.

²⁸Biklusu, le atheke teki nimak, mes anbi kesel in sonaf amsa in anbin.

²⁹Anmu'i lasi nono ha le nabeab kit leka hit atpanat sin naon esle':

³⁰Meo asu, mu'it abe'it ma amatanit anbi ale mu'it ma in ka na'tai fa neu sa' es amsa;

³¹bib keso, manu naif le in naot nenuin aon, ma kesel anbi in to sin matan.

³²Leka natuin ho monom nok nek anaeb ho mutenab ale lasi maufinu, ampantom!

³³Natuin, leka hom kebo susu, of ho mupeni in minan. Leka hom tepo atoni in panan, na' of anpoi. Leka ho mufena to'as, ho of amtam ambi matoes.