Read Uab Meto AMSAL 31 Bible Online

AMSAL 31 - Uab Meto bible

AMSAL 31

¹Le in molok-molok le Nai Lemuel in amaf, kesel Masa neu in anah,

²“Au anah, le au nek ani, le au unoni anfani on han taes neu au onen totis. Au of he umolok sa' neu ko ka?

³Kais muklosan ho be'im ma ho matanim neu bife. Anmu'i kesel namfau le maskuku nalali natuin bife.

⁴Mumnau, Lemuel! Minu tua min kase ma lomit he minu tua amafut kan matom fa neu ana' aplenat mese.

⁵Natuin, leka kesel ninu tua amafut, of in nikan aplenat ma naikoti atoni a'olet.

⁶Mninut amafut nane al neu kun sin le antam anbi susal ma sin le nekan antu'an.

⁷Sin ninun he nikan nukat ma sin susal.

⁸Ampesi mok atoni le kan pesi nan fa in monin. Muneo ma muhafo ale atoni a'olet sin.

⁹Ampaloli sin ma amfani alef lasi amneot neu sin. Muneo ma muhafo atoni amanukat ma asusal sin monit.”

¹⁰Bife ahinet susal na'taeku tokan; in maupa nesin noni klima amasat.

¹¹In mone of ka nanuka fa sa' es, natuin in nafnek neune.

¹²In kan bulalu fa neu in mone. In anmo'e alekot neune anbi in neno monit sin.

¹³In anmakoe ma nabuab ane ma bib kase in funu ma anmepu in abtais.

¹⁴In neki mnahat na'ko bale a'lot, onle bnao atoni asosa sin anmo'e nani.

¹⁵Anbi nok-noka in anfen ma naloitan mnahat neu in ume nanan, ma in anbati mepu neu in atuthaes sin.

¹⁶In nami afu pisa mese, ma in sos nani; nalali te in anmo'e anfani lene tua min kase.

¹⁷In naloitan ma anmepu neki in be'in in matanin.

¹⁸In nahin nak ale sa' le in anmo'e, neki upa neu in; es nane te in anmepu tal fai natnan.

¹⁹In nasun abas ma in antenu abtais.

²⁰In kan maskin fa neu amanukat sin; in nek mahoe neu sin le anlomi tuntakus.

²¹In ka namtau fa leka tabu manikin anbol, natuin sobalu maputu in naloitan neu in ume nanan.

²²In anmes es anmo'e fatu klima; in bale pake na'ko pilu muti kanalu amasat.

²³In mone nane atoni makana — in anfani on atopus mese anbi kot in nanan.

²⁴In anmo'e bael pake ma futu nalali te in nasosa neu atoni asosat.

²⁵Atoni namtausan in ma naupab in; ma in kan ole fa neu monit neno amnemat.

²⁶In namolok han malule; ma in uab nahenu nok hine.

²⁷In anma koe anbi mepu ma anpanat ma anpaloli in ume nanan.

²⁸In anah sin naupab in, ma in mone natuna in.

²⁹In mone na'uab nak, “Anmu'i bife nek alekot namfau,” “mes ho nek alekot anes na'ko ale sin.”

³⁰Humaf amasat nane ka mapalsai fa, amasat nane of namneuk; mes bife le na'ki anbi UISNENO maut he mapules.

³¹Amseunbanin ale in alekot sin; natuin in kun fenai le of matuna ma mapules anbi me-me!