Read Uab Meto AMSAL 4 Bible Online

AMSAL 4 - Uab Meto bible

AMSAL 4

¹Hoi au anah ki, amnen nai neu hi ama in fainekat! Ampanat lasi nane, he nati' him fani atoni alekot ma ahinet.

²Lasi le au noina neu ki nane in leko kun, es nane te kais amkius mumeku in.

³Leka au fe u bau, au umaika ok au ama ma au aina,

⁴au ama es nanoina kau. Ma in nak, “Mumnau au fainekat sin, ma kais amnikan sin. Munaoba au lekat ma au lulut sin, he nati' amalin anbi ho monim.

⁵Amfani atoni nek ahinet ma tenab na'aik! Mumnau au fainekat sin ma kais ampolin sin.”

⁶Muupab hine nane natuin in es naneo ma nahafo ko; amnek in natuin in es mes anpanat ko talantia ho mamun anbi ko monim.

⁷Lasi ahunut le mes ho he mo'e mani esle' amoni fani on ahinet mese ko. Sa' le ho he mami ma mupeni tenab alekot ma amneot.

⁸Amtuna lasi hine, es nane te in mes antuna ko amsa. Apul in ma in of anfe in upan neu ko.

⁹In mes antao nani anbi ho to'am on inuh he nati' anfani on sobe amasat.

¹⁰Amnen neu kau au anah ko! Ampanat leko au fainekat sin he nati' ho uam namnanu.

¹¹Au unoina ulali hine neu ko ma uton ulali ko monit amneot.

¹²Leka ho moni onane, ho monim mes ka maeka fa, ma ho mes ka mustun fa anbi tabu ho maen.

¹³Mumnau noina le hom simo mulali na'ko kau. Ampanat lasi nane lek-leko, natuin nok noina nane ho mes amseu monit in fuan.

¹⁴Kais mutuin atoni amaufinut sin monin, ma kais mumat sin mo'et.

¹⁵Kais amtao ho nekam neu sin, mu'lo mu'ko sin ma amnao piut.

¹⁶Atoni amaufinut mes kan tup fa fe nahunun na'ko he antao amle'ut. Sin mes kan sesa fa nahunun na'ko he naleun atoni bian.

¹⁷Maufinu ma maunu nane anfani mnahat ma mninut neu sin.

¹⁸Atoni amaufinut sin lanan nane anmes'ok onle fai ametak, sin ka nahin fa leka sin nastun ma natsel. Naik na'kone, atoni amneot nane in lanan onle manas anpe' ma naton in pinan, in meusinen nane anfonat ma nao piut.

²⁰Ampanat au uab sin au anah! Amnen nai au fainekat sin.

²¹Kais ampolin sin mes ampanat sin anbi ho nekam.

²²Atoni le nahik ma napan in mes napeni honis ma ua leko.

²³Ampanat ho nekam lek-leko, natuin ho nekam nane naton lanan neu monit.

²⁴Mu'lob ho monim na'ko uab poi, ma uab le nasekeb atoni.

²⁵So ho humam naton amneot na'ko ho nekam, kais ho mo'e onle poes natolo' anbi fatu in aon bian.

²⁶Mutenab lek-leko nahunu na'ko he mepu sa' es he nati' ho mepu manesa.

²⁷Mu'lo mu'ko amle'ut, ma moni nok amneot. Kais ambeo mu'ko lanan amneot le nane.