Read Uab Meto AMSAL 5 Bible Online

AMSAL 5 - Uab Meto bible

AMSAL 5

¹Au anah, mutuin neu kau! Ampanat ho hine ma tenab alekot le au unoina ulali neu ko,

²he nati' ho muhin, ho mes mutonom ma mauab on atoni ahinet.

³Bife apaisa in fefan min oni kun ma in uab sin anhanae nekak,

⁴mes leka ale lasi anfin alkun menu ma nukat es anbol.

⁵In mes natam ko neu atoni amates sin balan, ma lanan le in nao natuin nalul'on neu maten.

⁶In ka nabalah fa anbi lanan nao neu honis, in ka nahin fa neu in anbeo nalali na'ko lanan nane.

⁷Es nane te au anah ki, amnen au uab sin ma kais amtanhai sin.

⁸Mu'lob ho monim na'ko bife le nane, ma kais amhaumak in ume amsa.

⁹Leka ho mubua mok bife nane, atoni mes ka naupab ko fa, ma atoni le kan mu'i fa manekat mes naiti ho smanam anbi tabu ho fe munif ko.

¹⁰Atoni bian mes nah nani ho mu'im ma atoni le ho ka muhine fa mes nasik nan ho mepu in nesan.

¹¹Anbi amsoput ho mes amsanane, natuin menas nah nani ho aom.

¹²Es nane te ho mes mu'uab mak, “Ah, nansa' es au anun to'an neu fainekat?

¹³Au ka lomi he utuin au anoina sin ma ka lomi fa he utuin sin.

¹⁴Es nane te au hamu'iok anbi to naek sin matan.”

¹⁵Es nane te mu'ki neu ho fenai anmes ma muliaba alkun neu in.

¹⁶Ka maota fa neu ko leka ho mami aminat neu bife leka ho fenai fa.

¹⁷Malinat nane al neu ko mok ho fenai, ma ka neu fa atoni bian.

¹⁸Es nane te, so ho malin al mok kum ho fenai; mami nai amlilat nane anbi li'anfeto munif amasat —

¹⁹amas petis le hom simo tetus mulali mok in. Maut he nati' in aon amasat nane anhel ko ma anfutu namepan ko anbi manekat.

²⁰Au anah, otan sa' ka he nati' ho mubua amteni mok bife bian? Neu sa' ka es hom tup mubua amteni mok bife apaisa?

²¹UISNENO nit ale lasi le mansian anmo'e. UISNENO anpanat mansian leka in nao antam ma anpoi neu bale me.

²²Atoni amaufinut sin sanat onle kle'o neu in aon anmes kun.

²³In anmate natuin in kan lomi fa hen simo fainekat. In mono nane neki in neu amle'ut ma maten.