Read Uab Meto AMSAL 6 Bible Online

AMSAL 6 - Uab Meto bible

AMSAL 6

¹Au anah, oin ho manta'en neu atoni mese he nati' hom soi in tusa.

²Ma ho mutus natuin ho uab sin ma hom futnom natuin ho manta'en anmes kun.

³Leka namneo onane au anah, hom tam mulali neu atoni nane in niman. Mes le i lanan le he mufetnom: amnao labah neu atoni nane, ma amtoti neu in he nati' in nafetin ko.

⁴Kais amnao hem tup muhun ma kais musnas.

⁵Mufetnom na'ko kle'o le nane onle kolo ai lus le nafetnon na'ko atoni le anli'u in.

⁶Atoni apehet so in ankiso kiba in monit ma noina na'ko in.

⁷Kiba kan mu'i fa atopus, in kan mu'i fa ana' plenat, ai apanat,

⁸mes anbi tabu athoes sin nabuab neu tabu amnahas.

⁹Apehet nane hen tup antia leka anteni ka? Leka anteni na in anlomi hen fen na'ko in tupas?

¹⁰In antok ma in anli' in niman he nas-nas, ma in nak, “Ah, au he tup ateni natuin au sesa'.”

¹¹Mes anbi tupas in nanan, manukat ma mamu'it antoman in on atoni asikat neki kenat hen maken nok in.

¹²Atoni apoiba ma amonot sin napoibok anbi me-me.

¹³In nabae matan ma naton takaf he nati' napoibon.

¹⁴In tenab amle'ut nahenu nok tenab maufinu ma anmo'e mabanat anbi me-me.

¹⁵Ale lasi nane mes naton amle'ut antoman in aon nok askeken ma in mes namle'u nun fin kun.

¹⁶Anmu'i nan lasi nono hitu le UISNENO an un In to'an ma In ka nafetin sin esle': Neka naeb, fef apoiba, nimaf le namate atoni ka asanat, lolef le natenab lasi maufinu, haef le nao mat piut anbi amle'ut, asaksit neu lasi poi, ma atoni le napoitan lasi musu anbi in aon bian.

²⁰Au anah, anmo'e sa' le ho ama naplenat neu ko, ma kais amnikan ho aina in fainekat sin.

²¹Mumnau sin uab sin piut ma muhik mupan anbi ho nekam.

²²Sin noina sin mes antuntaku ko anbi ho lanan, anpanat ko anbi fai, ma anfani lekat ma lulut neu ko leka hom fen.

²³Lekat ma lulut na'ko ho ama ma ho aina anfani paku le anmeusin; ma sin noina naton neu ko monit alekot ma amnonot.

²⁴Nok nane te na'lob ko na'ko bife-bife apaisa sin, ma na'ko mo'et malaso atoni bian sin fenai.

²⁵Nati' kais sin masan es ankope ko, ma kais ho nekam anmo'e sanat natuin sin matan anhanoe ko.

²⁶Bife apaisa nane nabe'i atbaen teki mnahat pika mese in upan, mes mapaisa tok atoni bian in fenai mes atbaen teki hit smanak.

²⁷Nabe'i ka atoni in naif ai ma in sobalu mes kan put fa ka?

²⁸Nabe'i ka atoni anteli flae ma in haen ka napapa' fa ka?

²⁹In amle'un nane namnes nok hit tup tabua tok atoni bian in fenai. Sekau es anmo'e in mes ka nafetnon fa na'ko sanat.

³⁰Leka atoni nabak amnahat, maski nak in namnah, in mes masi'u ma maakan.

³¹Ma leka au heke in, in mes anbaen nafani hitu no hitu, nok nane in naneku nani ale in apinat.

³²Mes neu atoni apaisa nane onme ka? In nale'un in aon anmes kun! Nok nane te in amonot kun!

³³Mes nasi'ut inma nakle'at in. In kanan mes mateka neu lasi amle'ut tal nabal-bal.

³⁴Nok in mo'et nane bife nane in mone mes naktino in fenai talantia in nek maputu ansae. Ma leka in seunbanin in nek nanan, in mes kan mu'i fa manekat anbi in nekan.

³⁵In kan lomi fa maleko neki noni, opat naek onme amsa mes ka nasanut fa in nek to'as.