Read Uab Meto AMSAL 8 Bible Online

AMSAL 8 - Uab Meto bible

AMSAL 8

¹Mitnin! Nek ahinet nane ansakoi, hinet nane naaiti hanan.

²In anhake anbi tubu-tubu abit lanan in ninen, anbi lanan sin tefken.

³Anbi eno besi sin, ma lanan antam neu kot, in nanaeb in hanan anbi bale nane.

⁴“Hoi, to mansian, au sakoi neu ko, ale amonit anbi pah pinan, amnen au totis!

⁵Hi le ka mimtas fa anbi tenab, minoina he nati' hi lolem na aik; hi le nek manu ki, minoina he mihin.

⁶Ampanat au uab sin, natuin alsin antom ma namneo.

⁷Le au uton neu ki, nane amneot kun, natuin au uto' neu lasi poi.

⁸Au uab sin amneot kun ma kan mu'i fa es le he natol'on ai ansan.

⁹Neu atoni ahinet, au uab sin amneot kun, neu atoni atenab alekot, au uab sin antom.

¹⁰Miupab au fainekat sin anesin noni muti, mami mnesin lasi hinet nesin mnatu nesaf.

¹¹Au nek ahinet kau, le maupa nesin iun leko, le ka namnes fa nok sa' le hi mitenab he mami.

¹²Au nek ahinet kau; anbi kau anmu'i tenab alekot, hinet ma noina alekot.

¹³Ta'bes neu UISNENO in otan nak atnek nanan maufinu; au ka lomi fa neka moko ma neka naeb. Au nek nanan maufinu ma uab poi.

¹⁴Au es afe neu ki tenab. Ma au es utiaba ma utis ani neu ki. Au abe'it ma ahinet kau amsa.

¹⁵Au tuntaku uis kesel sin he nanaob plenat, au fiti ana' plenat he natau amneot.

¹⁶Natuin au manekat, ale anaet ma amu'it naplenat ma nanaoba amneot.

¹⁷Au nek sin le anlomi kau, ma le nami kau ma naeku nok kau.

¹⁸Anbi kau anmu'i amaus, upab ma athoes.

¹⁹Le ho mupeni na'ko kau anesin mnatu nesaf, maupa nesin noni muti.

²⁰Au utuin lanan amneot, ma au nao utuin lanan amneot.

²¹Atoni le in nek kau, mes au umu'ib in, ma au mes uhenu in ume eki maus.

²²Ahun-hunut UISNENO anmepu kau, au le i In anmepu kau anbi un-unun.

²³In anlek ma anlulu kau anbi un-unun, nahunun na'ko In anpakae ma anmo'e pah pinan.

²⁴Nahonis kau nahun na'ko In anmo'e tasi naek, nahun na'ko oe mata sin anpoi.

²⁵Nahonis nahunun kau nahun na'ko nahakeb ale tubu, ma nahun na'ko nafena ale neten sin.

²⁶Nahun na'ko UISNENO anmo'e pah pinan ma ale in mnela sin, ma nahun na'ko In nabuab afu ahun-hunut.

²⁷Au it leka In antao neno ma anlek, ma anlulu neno in oben anbi oe tasi in fafon.

²⁸Leka UISNENO antao nani ale nope anbi neno tnanan, ma In anfai ale noe naek sin matan.

²⁹Leka In naplenat oe tasi, he kais an el ma antanhai in ekat. Au amsa abi nane anbi tabu. In nabela pah pinan in sukin.

³⁰Au hake bi In aon bian onle In anah le In nek nani, anbi ale neno anfai In halinat; ma au u'ba-bae anbi In matan.

³¹Au umlil anbi pah pinan le In anmepu nani, ma umlil anbi mansian sin atnanan.

³²Es nane, te him nen neu kau, hoi atoni munif! Mituin au plenat sin, he nati' hi moni nok amlilat.

³³Amsimo nai fainekat, ma amfani nai ahinet, kais ho munebet in.

³⁴Ua alekot neu atoni le in nen kau le neno-neno in antok ma anpao anbi au ume enon, ma anpao anbi au eno naek.

³⁵Sekau es natef ma naeku nok kau, in mes napeni honis, natuin UISNENO antom nek in.

³⁶Sekau le ka naeku nok kau, in naeku in aon anmes kun, atoni le an un to'an neu kau nane in nek lasi maten.”