Read Uab Meto AMSAL 9 Bible Online

AMSAL 9 - Uab Meto bible

AMSAL 9

¹Nek hine nane nahakeb nalali ume, ma nahakeb nalali in ni hitu sin.

²In namate nalali mu'it neu tolas, ma in naloitan nalali tua min kase.

³In anlenu bife atuthaes sin he nati' sin etun ma naton na'ko bale amnanut anbi kot in nanan,

⁴“Sekau le in nen, so in nem labah!” Neu sin le ka naotab fa sin tenab nek hine nak,

⁵“Aim nai miah au mnahat ma minu au tua min kase le au uloitan ulali.

⁶Misaitan mono he nati' hi monim naleok, ma mituin atoni ahinet sin lanan.”

⁷Leka atoni kan lomi fa hen simo noina, ho mutonan in sanat, in mes anmanis ko. Leka ho matoe atoni amaufinut, in mes naakan ko.

⁸Kais munebet atoni le kan lomi fa hen simo noina natuin mes nato'an ko. Mes leka ho mutonan atoni ahinet sin sanat, sin mes naupab ko.

⁹Leka hom fainek atoni ahinet, in hine nane of ansato piut. Ma leka ho munoina atoni le natuin Uisneno, in hine of ansato anteni.

¹⁰He nati' amfani ahinet, ahun-hunut atoni so nabes ma namtausan UISNENO. Leka ho muhin Uisneno akuasat ma aknino kun, In mes anfe ko tenab alekot.

¹¹Hinet nane mes antalu ma anlut ho uam.

¹²Leka ho mu'i hinet, nane ho penit kun. Mes leka hom tite hinet ho mes muneku mani.

¹³Mono nane onle bife a'uab le kan mu'i fa hinet ma kan mu'i fa nek mae.

¹⁴In balan esle' anbi ume in eno ai kot in eno besi sin.

¹⁵Anbine in mes na'uab neu atoni le nao anfin. Ma in mes anpaitan atoni nek muti,

¹⁶“Ambeo mok i hi le fe ka mu'i fa hine!” Ma neu atoni le kan mu'i fa tenab alekot in nak,

¹⁷“Oe bakan nane min oni kun, ma tah ta'tolo'-tolo' nane namin anes kun.”

¹⁸Sin le anfani in amnahat ka nahin fa nak atoni le nem neu in natef nok in maten anbi nane; ma sin le mnahat anbi in ume, ma tabu le i sin antam nalali neu atoni amates sin balan.