Read Uab Meto PENGKHOTBAH 1 Bible Online

PENGKHOTBAH 1 - Uab Meto bible

PENGKHOTBAH 1

¹Molok-molok anbi sulat le i na'ko Atenab mese, esle' Nai Daud in anmone, le anfani kesel ma anseka Nai Daud anbi Yerusalem.

²Atenab le i nak: Ale lasi luman ma ka maota fa! Monit le i son-sona ma kan mu'i fa in nesan.

³Anbi hit uak monit hit at mepu ma hit puse ansai. Mes in nesan nane sa' ka le neki halinat neu kit?

⁴Sufa kauf bian anbol, ma sufa kauf nane namneku, mes pah pinan le i nabala kun.

⁵Manas fe naton in pinan ma of antes amsa. Nok olet ma kaet in anfani neu in balan ahunut nalali te anpe anfani.

⁶Anin anfu neu neno kabenan a'ne'u nalali te neu kabenan a'li, in anfun nalali te in anfani nem anteni.

⁷Ale noe ansai neu tasi, mes tasi ka nahenu nit fa amsa. Oe anfani neu noe in sain, ma ansai anteni.

⁸Ale sa' anlenan kit ma lasi lenan nane ka tabe'i fa. Hit matak ka namsen nit fa anbi kisot; ma hit lukek ka nasnas nit fa neu he natnin.

⁹Sa' le anmot nalali, of anmot anteni. Sa' le anmo'e nalali, of anmo'e anteni. Kan mu'i fa sa' esle' fe'u anteni anbi pah pinan le i.

¹⁰Anmu'i atoni le nabuab nak: “Amkiso nai, le i fe'u!” Mes nane anbine nalali nahun na'ko nahonis kit.

¹¹Atoni of ka namnau fa sa' le anbol nalali anbi tabu ahunut. Onane amsa lasi le anbol anbi tabu le i ma le of anbol atoni of ka namnau anteni fa anbi tabu amunit.

¹²Au atoni ahinet, au uplenat anbi Yerusalem anfani kesel neu Israel.

¹³Au lomi he nati' a'tae ma unoina nok hine neu ale lasi le anbol anbi pah pinan le i. Monit le Uisneno naloitan nalali neu kit namneo naton susal ma nu'ut.

¹⁴Au it ulali ale mo'et na'ko atoni pah pinan. Ampalsai nai, ale lasi nane son-sona, onle salit het li'u tatuin anin.

¹⁵Of ka taneo fa apenut, ma of kat so'i tan fa le kan bine fa.

¹⁶Au utenab, “Au fani ulali atoni mahine ma au ahinet kau, nesin ale atoni le naplenat nahunun kau anbi Yerusalem. Au nibun ma ubuab noina ma hine namfau.”

¹⁷Es nanet au sali he uhine ma ban'aika hine ma mono, ma nek ahinet nok nek mono.

¹⁸Natuin leka hit hine nane masato piut, nek ole nane amsa ansato ma nao piut. Hit hine nane ansato ma nao piut, hit susal ma nukat nane masato piut.