Read Uab Meto PENGKHOTBAH 10 Bible Online

PENGKHOTBAH 10 - Uab Meto bible

PENGKHOTBAH 10

¹Akbeo amates nafob min fomeni botil mese, ma mono akle'o naneku hine le amnanu.

²Amneot leka atoni ahinet anmo'e alekot, ma atoni amonot anmo'e bulalut.

³In monon lo natonon anbi in bekot. Ma neu ale atoni in naton in monon.

⁴Leka ana' aplenat nato'an ko, kais hom toti he musnas mu'ko mepu. Maski nak sanat nane naek, of in nek mamun ko leka ho moni nok nek asutais.

⁵Anmu'i anteni maufinu bian le au it anbi pah pinan, esle' ana' aplenat nabeoba plenat.

⁶Anfe toko amasat neu atoni amonot, mes atoni mateka ka napeni fa sa'-sa'.

⁷Anbi hae fes au it ate-ate sin ansaen bikase, mes atoni amu'it sin nao haen onle ate.

⁸Sekau es anhani bola', in of anmofu antam anbi in nanan; sekau es naskuku baki lape, kaun laso of ansau in.

⁹Sekau es anmepu ma anhani fatu, in of natutu'on ma napapa'. Sekau es anpol hau, oni of in napap.

¹⁰Leka ho benas namu' ma kam fone fa, of ho mepu nok susal ma nukat. Ampake ho tenab alekot, ma mutenab muhun.

¹¹Leka kauna ansau ko nahun na'ko ho mumau in meki le'u, mnane neu kauna kan mu'i fa in otan.

¹²Atoni ahinet nane in molok nane maupa, mes atoni amonot anmate natuin in molok anmes kun.

¹³In naleokbon natuin in poi, mes anbi amunit in molok nane on atoni amaunut.

¹⁴Namneo atoni amonot molok namfau, mes in neno monit in natol'on neu kit oke. Kan mu'i fa es le natenab neu sa' es of anbol anbi tabu hit atmate talali.

¹⁵Alkun atoni amonot es ka nahin fa lanan he naon fani neu in ume, in anmepu naek ma ka nas-nas nit fa.

¹⁶Amle'ut neu pah le in kesel munif, ma ale in anaet sin anmo'e buat anbi fai teme.

¹⁷Alekot kun neu pah le in kesel nane atoni makana, le in anaet sin anbukae anbi in tabu, ma sin anpanat sin aokenu na'ko lasi mafu.

¹⁸Ume in tefin of nabala leka ka maleko fa, ma ume nane of anmau natuin lasi pehe.

¹⁹Fesat anmo'e atoni ma anmani, ma tua min kase anhalin nekaf. Mes so anmu'i noni he nati' mabaen.

²⁰Kais mumolok amle'ut neu kesel anbi ho nekam. Kais mu'akan ma musi'u atoni amu'it anbi ho ke'an tupa in nanan. Oni kolo mese in nen sa' le ho mumolok, nalali te in natiaba neu atoni mese.