Read Uab Meto PENGKHOTBAH 11 Bible Online

PENGKHOTBAH 11 - Uab Meto bible

PENGKHOTBAH 11

¹Musufab ho noni anbi pah bian, fun anbi amunit of ho mupeni in sufan.

²Musufab ho noni anbi ale asosa anaek sin; ma mami noni namfau. Natuin atoni of anpanton nahun na'ko snama antoman in.

³Hau nane natsel neu neno kabenan me amsa, of in nabal bale le in natsel anbine. Leka nope nahenu nok oe le anmafen, ulan of ansanu naek neu pah pinan.

⁴Sekau es anpao talantia anin ma neno naknin'on, of in kan senaf ma in kan seu fa in nesan.

⁵Uisneno es anmo'e ale sa', mes mansian ka nahin fa In mepu; onane amsa of in ka nahin fa neu amoin fe'u anbi ainaf mese in apun.

⁶Amkifun ho fini anbi nok-noka, ma kais musnas anbi fai. Natuin hit ka tahin fa fini le me es monin of naleok. Oni of fini nane anmoni nok alekot.

⁷Manas in pinan neki halinat, es nanet of hit tamlil leka hit atamis.

⁸So leko munaeb Uisneno leko ho uam ansato anteni. Mes mumnau maski ho moni lo anbi pah pinan, tabu anbi nopu maten of a'lo nes. Es nanet of ho mufnek neu sa' ka? Ale lasi nane ka maota fa ma son-sona kun.

⁹So amalin anbi tabu ho munif ko, koi atoni munif! Mumlil ma mumoek tabu ho fe munif ko. Mutis mani sa' le hom sali anbi ho nekam, ma munaoba ale salit anbi ho nekam. Mes mumnau Uisneno abit neno tunan of anlefi lasi neu ale ho taos ma ho mo'et sin.

¹⁰Mulob nek ole ma nek susal na'ko ho nekam, natuin tabu munif nane of namneku labah.