Read Uab Meto PENGKHOTBAH 12 Bible Online

PENGKHOTBAH 12 - Uab Meto bible

PENGKHOTBAH 12

¹Mumnau Uisneno ho Apakaet leka ho munif ko, nahun na'ko ale ma'ne'at anbolan ko. Anbi tabu nane of ho mumolok mak, “Au ka umlil fa anbi au monit.”

²Leka antia in tabu of ho matam kan sinek anteni fa, talantia manas in pinan of namsab, funan ma afkun. Nope nasanut ulan, ma antoman ko on asnama.

³Ho nukum of nata'i ma kan panat anteni ko, fa ho haem le nenuon of nabeko ma kan matani anteni fa. Ho nisim of kan bine fa oke he nati' mutamu mnahat. Ma ho matam of nanipu talantia hom kisot namsab.

⁴Amlilat anbi lanan of namsab anbi ho nenat. Biola ma besi fole in hanan of namsab anbi ho tninas. Of ho kam tupam fini fa, ma kot-kotos in hanan of nabeab ko.

⁵Ho mumtau hem sae mutuin bale amnanut ma hom pantom anbi naot. Ho nakam funun anmof ma hom hel ho haem tabu hom nao. Es nanet ho salit ma ho lomit sin namneku. Hit atfani neu hit bale maika amsoput, ale atoni sin ankae ma ankul natuin lanan le sin nao natuin.

⁶Inuh noni muti of natfek ma nasitbon; paku mnatu of anmofu ma anpe', tani hela of anlapuma natfek; kusi of naskuku ma nasitbon.

⁷Hit aok of in nao, anfani afu anbi pah pinan. Hit asmanak of anfani neu Uisneno. In es anfe nani anfani tetus neu kit.

⁸Au umolok ak, namneo ale lasi nane son-sona, ale lasi nane ka maota fa ma kan mu'i fa in otan.

⁹Atoni ahinet nane anmu'i nek hine. Es nanet nanoina to mansian ale lasi le in nahin nani. In nanoina sit namfau ma in ansu' nani sin amneot.

¹⁰In nami ma naeku nok molok-molok halinat, ma uab-uab le in antui sin nane amneot kun.

¹¹Molok na'ko atoni ahinet nane tias a'aikat na'ko atuku bibi mese, tias le in anpake he naneo ma nahafo in bibi kase sin. In nabuab noina ma fainekat, onle kusat le makusa namepan. Nane Uisneno es anfe nani sin, ma in kun hit atukus.

¹²Au anah, neu lasi mese le he nati' hom panat. Tuis neu sulat of ka namsopu fa ma tanoina naek tahaeb hit aok ma smanak.

¹³Leka au utenab ulali ale lasi, le i uab amsoput le au upeni. Mumtausan Uisneno nai ma mutuin ale In plenat sin, natuin In anmepu kit alkun neu lasi nane.

¹⁴Uisneno of anlefi lasi neu ale hit taos hit mo'et, alekot ma amle'ut ma le matolo' amsa.