Read Uab Meto PENGKHOTBAH 2 Bible Online

PENGKHOTBAH 2 - Uab Meto bible

PENGKHOTBAH 2

¹Es nanet au ufek ulali he nati' halin au aok anmeskun he nati' au uhin neu amlilat nane. Mes ale lasi nane son-sona kun.

²Au nekak anbe neu mani nane amonot ma amlilat nane kan mu'i fa in otan.

³Natuin au sali he fani ahinet, au lomi he nati' umlil nok inu tua min kase ma mo'e buat. Au utenab ak nane alekot neu mansian he nati' antamis in monit le napal anbi pah pinan le i.

⁴Mepu naek au mo'e ulali sin. Au ufena ume neu au aok, au mo'e lene tuna ma lene he sen ani eki tua min kase ma ale hau fua namtis.

⁶Au hani nifu he nati' pofi ale lene ma etu nane.

⁷Au mu'i ate namfau leko le au sos, ai le nahonis anbi au ume. Au mu'it sin namfau nesin na'ko sekau le natua anbi Yerusalem sin mu'it.

⁸Au ubuab noni muti ma mnatu kesel anbi pah in nanan es anfe nani neu kau. Ale fenai anhalin au nekak neki sit. Ma au mu'i ate bife namnes nok au salit.

⁹Namneo, au naek a nesin sekau am sekau le namaika anbi Yerusalem, ma au hine amsa a nes.

¹⁰Ale sa' le au sali, au utiaba. Au ka eka fa au aok he nati' tamis malinat sa' es. Au malin neu ale au mepu nesan, ma nane au pa' ma au nama'.

¹¹Mes namuni te au tae teni ale au mepu, ma au haet ma mepu le au mepu ani nane au be' nak ale sa' nane kan mu'i fa in otan. Au mepu nane son-sona, onle salit he li'u utuin anin.

¹²Onane amsa kesel mese nabe'i anmepu sa' le kesel ahunut sin anmepu nalali nahunun na'ko in. Es nanet au utenab: Atfani ahinet, amonot ai ako'ut in otan sa' ka?

¹³Namneo au uhin, “Hine nane leko nes kun na'ko mono, onle meusine naleko nes na'ko mesokan.

¹⁴Atoni ahinet nabe'i nit salit le in he natuin; mes atoni amonot, onle na' ma nao. Mes au amsa uhin nok monit le namnes of antom neu sin oke.

¹⁵Es nanet au utenab, 'Monit le antoman atoni amonot of au nao utuin amsa. Es nanet au hine nane in otan sa' ka?' Es nanet anbi au tenab nak hine nane kan mu'i fa in otan amsa?

¹⁶Atoni amonot of manikan lab-labah, mes atoni ahinet amsa of ka namnau fa. Hit tenab of namseu ma namsab. Hit ale'ut of atmate, leko atoni ahinet ma atoni amonot.

¹⁷Es nanet neu kau, monit nane kan mu'i fa in otan, bian kan mu'i anteni fa. Ale lasi nane son-sona. Onle au li'u utuin anin.

¹⁸Ale au mepu in nesan, sa' le au upeni nane kan mu'i fa in otan neu kau, natuin of au usaitan sin neu in le anseka kau.

¹⁹Ma sekau es nahin neu in le nane ahinet ai amonot? Mes onme amsa in es of anfani apanat neu au mepu ma au haet in nesan leka au fe a'moni bi pah pinan le i nane au haet ma au hine. Es nanet lasi nane in son-sona kun.

²⁰Tabu le i au tofok natuin au mepu nok mafena.

²¹Natuin mansian anmepu mafena natuin hine, tenab alekot ma noina he nati' in napeni sa' es. Mes anbi amunit in nasaitan in haet in nesan neu atoni le ka napoitan nit fa in puse neune. Nane amsa son-sona kun, ma nane ka naton fa amneot!

²²Mansian anmepu mafena anbi in neno monit sin ma antam anbi susal nukat es nanet in haet in nesan le hen halin in esme ka?

²³Ale sa' le in anmo'e tabu in fe anmoni al neki nukat ma menas neu in nekan. In nekan namen piut leka mesokan anbol. Es nanet ale sa'-sa' nane son-sona kun.

²⁴Kan mu'i fa sa' le naleko nesi neu mansian na'ko mnahat, mninut ma namlil natuin in mepu nesan. Au nekak nahin ale lasi nane Uisneno es anfe nani.

²⁵Sekau es of anbukae nok malinat ka nok fa tuntakus Uisneno?

²⁶Uisneno anfe hine, tenab alekot ma halinat neu atoni le antom nek In. Mes neu atoni asanat In anlenu hen mepu he nami mnahat, nabuab in nesan ma anfe neu atoni le anhalin Uisneno In nekan. Es nanet ale lasi nane son-sona namnes onle atli'u tatuin anin.