Read Uab Meto PENGKHOTBAH 3 Bible Online

PENGKHOTBAH 3 - Uab Meto bible

PENGKHOTBAH 3

¹Ale sa' anbi pah pinan le i anbol natuin in tabu le Uisneno anlek nani.

²Uisneno anlek tabu neu mahonit ma tabu neu maten, ma tabu neu het sen ma tabu neu het bok,

³ma tabu neu he nale'un ma tabu he naleko, ma tabu he nabaina ma tabu he nafena.

⁴Uisneno anlek tabu neu het kae, ma tabu neu het mani, tabu kulut ma neu tabu he tabso',

⁵tabu he tup tabua ma tabu he tabaitsok, tabu het mahaumakan ma tabu het eka hit salit.

⁶Uisneno anlek ma anlulu tabu neu he naekub kit, ma Uisneno anlek tabu neu he tabaitsok, tabu he tabuab ma tabelak, ma tabu neu he taklosan.

⁷Tabu neu het pisu ma tabu neu het so, tabu neu he ta' ma tabu neu he tamolok.

⁸Uisneno anlek tabu neu het manek ma tabu neu het un to'ak, tabu neu het maken ma tabu neu het halan.

⁹Hit haet ma hit mepu in nesan nane sa' ka?

¹⁰Au uhin neu Uisneno anfe kit baut mafena.

¹¹In anlek ma anlulu tabu le anmatom neu ale sa'. In anfe neu kit salit ma lomit he tahin neu monit anbi neno amnemat mes hit ka tahin fa Uisneno In mepu na'ko ahunut tal namsopu.

¹²Au uhin neu kit, kan mu'i fa le naleko nes na'ko malinat le of hit atamis anbi neno monit.

¹³Naleko nes so hit tah ma tinu ma tamlil natuin hit mepu in nesan, natuin nane Uisneno es anfe nani neu kit.

¹⁴Au uhin ale mepu Uisneno nane of tal nabal-bal. Mansian of kan sato ai anbati nani fa. Ma Uisneno antao ma anmo'e onane he nati' hit tamtausan In.

¹⁵Le tabu le i anbol, in anbol nalali anbi tabu ahunut. Le of anmu'i, nane anmu'i nalali anbi ahunut. Uisneno anlek ma anlulu nalali he nati' sa' le anbol nalali anbol anteni.

¹⁶Anmu'i le au it ateni anbi pah pinan le i: esle' leka anbine anmu'i amneot ma alekot, maufinu of anbol anbine amsa.

¹⁷Anbi au tenab, Uisneno of anlefi lasi neu atoni nek leko ma atoni amaufinut, natuin ale lasi ma ale mo'et of anbol anbi tabu le Uisneno anlek ma anlulu nalali.

¹⁸Au tenab on i: Uisneno ansu' kit he naton neu kit nak hit lanan monit nane ka nasuli fa nok mu'it in monin.

¹⁹Onme amsa, monit na'ko mansian ma mu'it nane namnes. Es of anmate, ma es amsa of onane. Sin nuasin nane amonit ok-oke. Es nanet mansian ka nis anesi fa mu'it, natuin neu sin nua sin. Sin monit nane son-sona kun.

²⁰Sin nua sin of anao neu bale le namnes, anmo'e sin nua sin na'ko afu ma of anfani neu afu.

²¹Ai hit tahin nak, smanaf na'ko mansian nane ansae neu fafon ma smanaf na'ko mu'it nane ansanu neu afu in nanan.

²²Es nanet au be' neu kan mu'i fa sa' le naleko nes neu mansian na'ko nah in mepu in nesan. Naik na'ko nane kan mu'i fa sa' le nabe'i he nati' in anmo'e. In of ka nahin fa neu sa' of anbolan leka in anmate nalali.