Read Uab Meto PENGKHOTBAH 4 Bible Online

PENGKHOTBAH 4 - Uab Meto bible

PENGKHOTBAH 4

¹Nalali te au panat ateni lasi susu' ma kake' le anbol anbi pah pinan le i. Atoni-atoni le nasusu' sin, ankae ma kan mu'i fa es le hen tuntaku sin. Kan mu'i fa es he nati' anbab sin natuin asusu'-asusu' nane sin anmu'i kuasat anaek.

²Au nekak namen leka au umnau atoni-atoni le anmaten lo natuin sin malinat anaek anes na'ko atoni-atoni le fe anmonin.

³Mes namlilan nesin esle' atoni-atoni le fe ka nahonis sin fa, natuin sin fe ka nit fa maufinu le anbol anbi pah pinan le i.

⁴Au uhin amsa neu mansian nane anmepu naek, natuin in nekan namenan in aon bian leka in nit sin mepu in nesan. Ale lasi nane of son-sona kun onle het li'u anin.

⁵Mes al atoni amonot es antok ma anablas ma nafetnon hen tam anbi maten natuin amnahas.

⁶Nane oni namneo, mes naleko nes maus akle'o nok nek tainine na'ko atmepu mafena teki hit nimak nua sin, ma atli'u anin.

⁷Fe anmu'i anteni lasi le son-sona kun anbi monit le i.

⁸Anmu'i atoni le anmoni anmeskun ma kan mu'i fa li'ana ai olif ma tataf. Maski nak in nahaebon anbi mepu ma in nekan kan lenan fa maus. In anmepu anteni neu sekau ma antite malinat nane? Nane amsa son-sona ma nane monit le nahenu nok nu'ut.

⁹Hit nua naleko nes na'ko hit atmes. Leka sin anmepun, in nesan nane naleko nes.

¹⁰Leka es anmofu, es antuntaku in. Mes leka atoni es anmof ma in anmes in of namle'u ma kan mu'i fa es hen tuntaku in.

¹¹Anbi fai manikin, atoni nua le antup anmahaumakan of anmaputun mes anmo'e onme ka neu atoni le anmes in hen maput.

¹²Atoni nua le sin nao nabuan of nabe'i hen be'u makenat, mes atoni le anmes of in naen. Tani nono tenu le an ane sin anfani mese he tafeket of matani.

¹³Atoni anukat nabe'i anfani kesel, ma atoni o'of mese of nabe'i naplenat. Mes leka kesel mese namnasi in of kan lomi fa hen simo fainekat, es nanet in monin nane of namle'u nes na'ko atoni munif anukat mes ahinet.

¹⁵Au utenab neu ale atoni anbi pah pinan le i, es nanet au nekak atfai nak anbi atoni munif sin atnanan mese of anseka kesel.

¹⁶To le in antopu of in amfaun ka maso'ik fa, mes leka in nao kun, ka tit fa es he namnau in mepu. Namneo ale lasi son-sona kun namnes nok salit het li'u tatuin anin.

¹⁷Ampantom leka ho hem nao meu Ume UISNENO. Leko nesi amnao meu bale nane he munoina na'ko he mutulu fua lolot, onle atoni-atoni amonot sin anmo'e nani. Of sin kan fanaika nahin fa me es amneot ma me es ansan.