Read Uab Meto PENGKHOTBAH 5 Bible Online

PENGKHOTBAH 5 - Uab Meto bible

PENGKHOTBAH 5

¹Mutenab fe nahun na'ko he mumolok, ma kais amanap he mo'e manta'en neu Uisnneo. In es neno tunan ma ho es ko pah pinan es nanet ampanat ho molok sin.

²Leka hit nek ole nane antu'an ma nao piut, of tapeni hakataus anbi nanait. Leka tauab a naek a nes, of hit tapoitan uab mono namfau nes.

³Es nanet, leka ho manta'en neu Uisneno, so mutisi lab-labah. In kan lomi fa atoni le anmoni on amonot, es nanet mutiaba ho manta'en neu In.

⁴Alekot anes kun leka kat mo'e fa manta'en na'ko atmoe manta'en mes ka tatiaba fa.

⁵Kais ho molok sin anmo'e ko talantia ho musanab ma ho musesbom ma mumolok neu ana' fuat knino le antuthae UISNENO, ma ho mutenab amsan neu he manta'en. Neu sa' ka es ho mutoab Uisneno talantia nale'un Ho mepu in nesan?

⁶Onle nanait namfau le kan mu'i fa in otan, es nanet tamolok namfau kan mu'i fa in otan amsa. Mes so mumtausan neu UISNENO.

⁷Kais mumkak leka ho mit ana' plenat nasusu' atoni anukat, ma nasik sin ini, ma kan mo'e fa amneot neu sin. Nakaf mese of anpanat in ameput ma ana plenat anesit of anpanat sin nua sin.

⁸Kesel in monin naponion neu in mepu nesan.

⁹Atoni le ankoman noni, in noni of kan tia nit fa; atoni le anlomi he nabuab amaus, of kan malin fa nok mnisat le in napeni.

¹⁰Leka atoni mese in maus antu'an ma nao piut, in of kan hao fa atoni namfau anteni. Of kan mu'i fa otan neu atoni nane al in nahin neu in amu'it.

¹¹Atoni ameput mese in amnahat of kan tia nit fa, mes of in antup anfin amsa, mes atoni amu'it mese of kan tup anfin fa natuin nek olet.

¹²Au nit lasi mese anbi pah pinan le i neki nek nu'ut: Atoni mese nabuab amaus neu tabu nukat.

¹³Mes amaus nane of namneku natuin amle'ut antoman, talantia kan mu'i fa sa' es he nati' in nasanut anteni neu in anah sin.

¹⁴Nahonis kit nok monas, onane of tasaitan pah pinan le i, ka tek fa sa' es na'ko hit haet.

¹⁵Nane namneo nanukab hit nekak. Hit of atnao atfani onle tabu nahonis kit. Hit tahaebok het li'u tatuin anin, mes in nesan nane sa' ka?

¹⁶Tabu hit atmoni, hit tableo anbi mesokan in nanan, hit tasusbok, hit taoelbok, hit tato' ma hit nekak namen.

¹⁷Es nanet au uhin nak alekot anesit neu kit esle' tah ma tinu ma atmalin nok hit mepu in nesan, anbi monit apalat leu Uisneno anfe neu kit; hit monit in onane.

¹⁸Leka atoni mese ansimo maus ma mu'if na'ko Uisneno, ma Uisneno ka nafetin fa in he nati' in antamis nit maus nane, so in nanaeb In, ma namlil nok ale in mepu nesan. Nane Uisneno es anfe amsa.

¹⁹Uisneno nahenu atoni nane in nekan neki halinat, es nanet in ka naoleb fa in tenab neu in monin napal.