Read Uab Meto PENGKHOTBAH 6 Bible Online

PENGKHOTBAH 6 - Uab Meto bible

PENGKHOTBAH 6

¹Au it ateni lasi susu' ma kake' le nanisi mansian anbi pah pinan le i.

²Anfoe nan Uisneno anfe maus upab ma mu'if neu atoni mese, talantia mansian kan salin teni fa. Mes Uisneno ka nafetin fa in he nati' in antamis ale sa' le in anfe nani. Onane amsa atoni le in ka nahin nani fa of antamis nane. Es nanet ale sa'-sa' nane of son-sona ma neki nek tu'as.

³Maski nak atoni mese anmu'i li'ana natun mese ma in napeni ua mnanu tal namnasi, mes leka in kan moni fa nok amlilat ma in ka napeni fa palolit nok alekot, es nanet anbi au tenab li'ana le fe nahonis anmate kun in monin naleko nesi atoni nane.

⁴Natuin of kan mu'i fa lasi neu li'ana nane neu nahonis ai kahaf; in nao neu mesokan in nanan es nanet manikan labah.

⁵In of ka nit fa manas in pinan, ma in ka nahin fa monit le in otan, es nanet in antup nok tainine.

⁶In monin of naleko nesi na'ko atoni le anmoni nan ton natun nua, ma ka naeku nok fa malinat. Ai sin ka nua sin fa nao neu bale mese amsa?

⁷Mansian anmepu neu hen bukae, mes in kan malin nit fa.

⁸Es nanet atoni ahinet nane in nis sa' ka? Leka tanesa nok atoni amonot? In otan sa' ka leka atoni anuka in monin naleko anbi atoni amfaut sin atnanan.

⁹Ale lasi nane son-sona, namnes onle atli'u tatuin anin. Alekot anes leka hit tamlil nok sa' le hit atmu'i na'ko hit atsali het mu'i le namfau nesi.

¹⁰Ale sa' le anbin, nane esan nalali anbi ahunut. Hit tahin nak mansian of kan laban fa atoni nabe'i nesin in.

¹¹Leka in matoe nao lo, in molok sin ka maota fa ma of in ka nis fa sa' es amsa.

¹²Anmo'e onme he nati' atoni nahin sa' es naleko nesi neune anbi in monin le napal ma ka maota fa, ma le anfin kun onle mafo? Anmo'e onme atoni mese nabe'i nahin sa' le of anbol anbi pah pinan le i leka in kan bine fa anten?