Read Uab Meto PENGKHOTBAH 7 Bible Online

PENGKHOTBAH 7 - Uab Meto bible

PENGKHOTBAH 7

¹Kanaf le anfomeni naleko nesi na'ko mina maupa, ma neno maten nane naleko nesi na'ko neno nahonis kit.

²Leko nesi atnao neu ume nu'ut na'ko atnao neu bale buat. Natuin of hit tatenab piut neu nopu maten anpao atoni mes-mese piut.

³Nu'ut naleko nesi na'ko mani, maut he nati' hit matak oen ansai, mes nekak namlil.

⁴Atoni amonot es anli'u piut malinat; mes atoni ahinet natenab piut neu maten.

⁵Alekot anes atoni nek leko nabokan kit na'ko atoni ka mahinet es anpules kit.

⁶Atoni amonot in mani kan mu'i fa in otan, in onle ai notu kisan in katila.

⁷Leka atoni ahinet es anfuli, in taos nane on amonot; leka in ansimo noni poh fefaf, in lolen nane amle'utkun.

⁸Leko nesin lasi in amsopun na'ko fe anfatan; leko nesin lasi sutais na'ko lasi neka naeb.

⁹Kais amanap he muto'; natuin al atoni amonot es napan lasi maamun anbi in nekan.

¹⁰Kais mutan, 'Nansa' anbi tabu ahunut naleko nesi na'ko tabu le i?' Natuin alkun atoni amonot es natoti onane.

¹¹Atoni amonit so leko napan hine; natuin hine in upan namnes nok amaus.

¹²Namnes amsa nok noni le neki nek tainine. Nansa' anteni noina neu hine! Sekau es anmu'i hine napeni honis.

¹³So ampanat Uisneno In mepu. Natuin sekau es of namneob sa' le Uisneno napenub nani?

¹⁴Es nanet mumlil nai leka ho mueku mok malinat. Mes leka asnama antoman ko kais amnikan natuin Uisneno es anfe sin nua sin. Hit ka tahin fa neu sa' es of anbol anteni anbi amunit.

¹⁵Au monit le i kan mu'i fa in otan, mes anbi au monit le nane au it onle i: Anfoenan atoni nek alekot anmate maski nak in nek muti. Anmu'i atoni amafinut uan namnanu, maski nak in nasanab piut.

¹⁶Kais muleko mis, ma kais muhine mis. In otan sa' ka leka hom lolo ho aom?

¹⁷Kais amaufinu mis ai amono mis. In otan sa' ka ho mate nahun na'ko in tabu?

¹⁸Mulobom mu'ko sin nua sin. Leka hit tamtausan Uisneno, hit of tapeni ale lasi alekot.

¹⁹Atoni le anmu'i lasi hine of nabe'i ma namep anesin ana' plenat bo' mese anbi kot mese.

²⁰Anbi pah pinan le i kan mu'i fa atoni mese le naleko nes, kan mu'i fa es amsa le anmo'e piut ale lasi amneot ma kan mu'i nit fa sanat.

²¹Kais amlomi he mutuin ale molok, sekau es nahin atuthaes mese anfe ko kasat.

²²So ho amsa ambe' nai fun ho amsa anbi ahunut amfe mulali kasat neu atoni bian.

²³Ale lasi nane au su' ani eki au nek hine. Mes leka au mu'i nek salit he ami lasi hine nane, in na'lokun piut na'ko kau.

²⁴Sekau es naeku nalali nok monit le i in otan? In amnanu le'ufkun neu he nati' tahin in.

²⁵Mes au umep anbi noina ma au ami lasi hine, he nati' au upeni nek hine ma au ube'i utae ale han totis. Au su' uhine neu sanat nane naton mono, ma maufinu nane naton salit.

²⁶Au upeni nak bife nane menu anesi na'ko maten. Maliaba na'ko bife nane onle tifkai ma habi le naloitan hen heke in musu. In mo'et nane onle kolen besi le anfutun namepan kit. Atoni le nanaoba Uisneno In lomin, in nafetnon na'ko kleot, mes of in anheke nan atoni asanat sin.

²⁷Amkiso, Ane'ob nane nak: Ale lasi nane au u'eku okan tabu au ami han taes na'ko tabu nao neu tabu.

²⁸Au fe ami teni han taes bian, anteni mes au ka upeni fa. Anbi atoni nifun mese, au u'eku ok atoni mone mese le au u'upab ani in. Mes anbi sin au ka u'eku fa bife mese he nati' au ubes neu in.

²⁹Al lasi le i es au u'eku okan: Uisneno anmepu kit he tamlil tok sa' le hit atmu'i, mes hit mes kuk es atfun ma athafon hit aok.