Read Uab Meto PENGKHOTBAH 8 Bible Online

PENGKHOTBAH 8 - Uab Meto bible

PENGKHOTBAH 8

¹Amlilat ma amoket neu atoni ahinet. Natuin in nahin han taes neu ale lasi. Hine namanib in neki amlilat, talantia in namlil anbi in neno monit sin.

²Mitnin ma mituin leka kesel anfe plenat, ma kais amanap he mo'e manta'en neu Uisneno.

³Kesel nabe'i hen mo'e ale lasi, namnes nok in lomin, alekot anes milobom mi'ko in.

⁴Kesel naplenat neki kuasat; es nanet kan mu'i fa esle' hen matoe nok in.

⁵Atoni le natuin in of anmoni nok halinat ma tetus; atoni ahinet mes nahin leka he tatuin kesel onle me.

⁶Neu ale sa' anmu'i in tabu ma in lanan anmes, mes kleot ka es hit tahine.

⁷Kan mu'i fa atoni mese es of nahin neu in monin, ma kan mu'i fa es neu he namolok neu sa' es of anbol neune.

⁸Ka tit fa atoni mese le aneka ai hen eka in tabu maten. Nane mepu naek le of ka tafetnok fa ta'kone, maski nak nok poi ai fulit.

⁹Ale lasi le au it leka au panat ale lasi le anbol anbi pah pinan. Anmu'i mansian le anpake in kuasat he nale'un in aon bian.

¹⁰Au it atoni amaufinut mese anmate ma ansub in. Mes leka atoni-atoni anfain na'ko maten, sin anpules in anbi kot, bale in anmo'e ale maufinu. Nane son-sona kun amsa.

¹¹Nansa' es nok manoe atoni anmo'e maufinu? Natuin kasat kan fe fa labah.

¹²Maski nak atoni asanat anmo'e maufinu nonon natuin mese in anmoni nabalah ma in uan namnanu nabalah amsa. Mes sekau es natuin Uisneno, in of napeni ale sa' nok manoe anbi in monin.

¹³Mes atoni amaufinut of natef ma naeku nok susal ma nukat. In monin of anfin labah onle mafo. In of anmate anbi tabu in munif natuin in ka napane fa neu Uisneno.

¹⁴Mes ale lasi nane luman kun. Amkiso nai sa' es anbol anbi pah pinan. Anmu'i atoni nek muti ankas in on atoni amaufinut, atoni amaufinut anseunbanin on atoni nek muti. Es nanet lasi nane son-sona kun.

¹⁵Anbi au tenab atoni so namlil. Natuin anbi in monin anbi pah pinan kan mu'i fa malinat bian neu in alkun mnahat, mninut ma malinat. Nane es of in naeku nokan anbi in monit le Uisneno anfe nani neu in.

¹⁶Leka au ami he nati' upeni lasi hine, ma au panat ale lasi le anbol anbi pah pinan le i, au uhin neu maski nak hit tami ale lasi nok nek tu'as ma susal ma ka tasnas fa anbi fai ma manas.

¹⁷Hit of ka tahin fa Uisneno In mepu. Maski nak hit tami onme amsa of hit ka tahin tani fa. Atoni ahinet nauab nak in nahin, mes namneo in ka nahin fa.