Read Uab Meto PENGKHOTBAH 9 Bible Online

PENGKHOTBAH 9 - Uab Meto bible

PENGKHOTBAH 9

¹Ale lasi nane au utenab lek-leko. Uisneno nanon atoni nek leko ma ahinet sin monin, maski atoni nane an un in to'an ai anmu'i in manekat. Kan mu'i fa le nahin sa' es of anbol anbi tabu amunit.

²Namneo mo'et namnes of antoman atoni mese-mese. Atoni amneot ai atoni abulalut, atoni alekot ai atoni amaufinut, atoni knino ai atoni asanat, atoni le natulu fua tulu ai kahaf. Atoni alekot of ka naleko nesi fa na'ko atoni asanat, atoni le anmo'e supat namnes nok atoni le kan mo'e fa supat.

³Es nanet monit le namnes of antoman ala sin. Ma nane lasi le neki nek nu'ut namnes nok ale lasi le anbol anbi pah pinan. Anbi monit mansian in nekan nahenu nok maufinu, ma in tenab nahenu nok mono. Ma nok askeken in naeku nok in tabu maten.

⁴Mes leka smanaf amonit fe anbi in aon, nane fe anmu'i fnekat amsa. Ai asu kan moni fa nok amlilat, nes na'ko meo asu le ka masnasa fa?

⁵Oni maski nak onme amsa, atoni amonit of nahin neu in tabu amsopun anhat ma anpao in, mes atoni amates ka nahin fa sa'-sa'. Neu in kan mu'i fa in upan ai in seunbanin, ma in kanan of manikan.

⁶Nek amanekat, un to'an ma sinmakat, of al sin anmate nok in. Of in kan painote anteni fa anbi ale lasi le anbol anbi pah pinan le i.

⁷Es nanet ambukae nai ma mimlil nai, minu nai tua min kase nok amlilat. Uisneno kan tite fa, mes In ansimo nani.

⁸Maut he nati' ho humam anmeus ma anpin.

⁹Amalin nai anbi ho monim mok ho fenai le hom nek mani, anbi ho monim le son-sona le Uisneno anfe neu ko anbi pah pinan. Amalin neno-neno maski nak ka maota fa. Natuin ho haet in nesan alha le nane.

¹⁰Amepu ho mepu sin meki ho be'im ma ho matanim. Natuin of kan mu'i anteni fa tenab ai mepu. Kan mu'i anteni fa mepu ai hine anbi nopu naukel. Bale le of hom nao meune.

¹¹Anmu'i anteni le au it anbi pah pinan le i: atoni le anmanoe of ka nis fa piut anbi hopu, ma atoni meo of ka nis fa piut anbi makenat. Atoni ahinet of ka napeni fa mepu piut. Atoni amonot of kan fain fa atoni a'mu'it piut. Ale atoni ahinet of kan tomat fa piut. Natuin ale amonit of naeku nok tabu amle'ut.

¹²Mansian of ka nahin fa leka in tabu antia. Onle kolo antam anbi kleot ma ika antam anbi tifkai, onane amsa snama of antoman mansian anbi tabu le in ka natenab nani fa.

¹³Le i leta amneot mese neu anmo'e onme ka neu atoni le naupab nek ahinet:

¹⁴Anmu'i nan kot abaut mese le in atokos anbine ka namfau fa. Anbi neno es kesel nem ma he nale'un kot le nane.

¹⁵In anfun in nalali te in naloitan he naskuku in baki lape. Mes anbi kot nane anmu'i atoni amanukat ahinet mese, le nafetin nani kot nane, mes natuin in amanukat, in alekot nane manikan ma kan mu'i fa esle' namnau in.

¹⁶Es nane anbi au tenab hine nane naleko nesi na'ko be'it matani. Maski onane, hinet atoni amanukat ka mafiloli fa. Ma in uab sin ka manena fa.

¹⁷Naleko nesi atnen molok na'ko atoni ahinet na'ko hunun na'ko ana' aplenat anbi atoni amonot sin atnanan.

¹⁸Hine maupa nesin kenat, mes taum in oen lonit mese nale'un susu tasu mese.