Read Uab Meto KIDUNG AGUNG 3 Bible Online

KIDUNG AGUNG 3 - Uab Meto bible

KIDUNG AGUNG 3

¹Anbi fa-fai, anbi au hala tupa, anbi nanait au ami in le au nek ani, au ami in mes son-sona kun.

²Au fen ma fun utef kot in nanan, au nao utuin ale lanan ma hoef. Au ami in le au nek ani, au ami in mes son-sona.

³Au utef ok apao kot, ma au utoit sin, “Ai hi mit in le au nek ani?”

⁴Leka au nao utuin sin, au utef ok in le au nek ani. Au na' in ma au ka ufetin fa in talantia au eki neu au aina in ume neu ke'an le nahonis kau anbine.

⁵Maiti fef bela, hoi fetnai Yerusalem, natuin ale lus ma bibi fui anbi mnela, of hi kam eka fa maliaba talantia au umsen.

⁶Sa' es nem na'ko mnela snaen, nabaina anfani masu? In fon onle min fomeni ma klali, ma bedak afo menit na'ko asosa sin.

⁷Amkiso, Nai Salomo in toko, le meo pa'e bo'ne es anfun natef, sin le nane atoni-atoni abe'it na'ko Israel,

⁸le anmu'i hine anbi makenat. Alsin naikab hen be'u musu anbi fai neki suni anbi sin atnanken.

⁹Nai Salomo anmoe nani neu in toko mese, na'ko hau alekot.

¹⁰In ni sin anmoe sin na'ko noni muti, ma in sonlait nane na'ko mnatu. In toko hum kanalu, ma nok malinat fetnain Sion anso nani.

¹¹Ampoi nai hoi fetnai Sion, amkiso nai Kesel Nai Salomo nok in sobe mnatu le in ainaf antao nani, anbi in neno mafet mamonet, anbi in neno malinat.