Read Uab Meto KIDUNG AGUNG 5 Bible Online

KIDUNG AGUNG 5 - Uab Meto bible

KIDUNG AGUNG 5

¹Au aum neu au lene, bae feto, au fetnai, au nibun min fomeni ma au hau fua afomenit; au bukae oni mauf ma au oni oef, au inu susu ma tua min kase le au in ini. Ambukae ma minu nai au sob leko ki, minu talantia hi mafu maliaba.

²Au tup mes au nekak anbe. Amnen nai, in le au nek ani anleku eno. Musoitan kau eno, au fetnai, le au nek ani, au kol otos, le au nekak naliaba; au nekak napet natuin akum, au nakfunu nahenu nok akum fa-fai.

³Au kasu ulali au sobalu; ai of au he pake teni ka? Au boe ulali au haek, ai of au he ule'un teni ka?

⁴Au nekak ansanu ma ansae natuin in le au nek ani in na' eno in sefin.

⁵Es nane te au fen he nati usoitan eno neu in le nek ani. Min fomeni anloli na'ko au nimak ma au kluluk, ma napet eno in sefin.

⁶Au usoitan eno neu in le au nek ani, mes in nao anfani koti nalali. Au sali he nen ateni in hanan, au ami in mes son-sona kun. Au boin in kanan, mes in ka natae fa.

⁷Apao kot sin naeku nok kau; sin antepo kau ma napapa' kau. Sin nasesab kau ma ansimo nan au mau ana.

⁸Amanta'en nai hoi fetnai-fetnai Yerusalem, leka hi mieku mok in le au nek ani, miton neune au umenan maliaba.

⁹Ai in le hom nek mani namasan nesin bae feto bian, hoi fetnai amasat anesit? Ai sin le hom nek mani anesin bae feto bian, es hom lenu he hai manta'en.

¹⁰In le au nek ani naleko ma namasa anesin atoni nifun bo'mese.

¹¹In nakan on mnatu, mnaut nesaf, in nakan funun naklenion ma metan onle kol ka metan.

¹²In matan onle kol kase anbi oe mata, kol ot kase le naniu susu, ma antok anbi nifu in ninen.

¹³In kun-kunun onle lene hau fomeni le anfomen, ma in lulun onle tun uk-uki le ansain min fomeni le ka maselo fa.

¹⁴In klulun namas, nok kleni mnatu ma fatu klima, in aon onle nit molo le matesi nok fatu klim maet molo.

¹⁵In haen onle ni-ni fatu klima muti, ma ansuki neki mnaut nesaf. In haken namas onle tubu-tubu Libanon, ma nahelan onle hau bon kase.

¹⁶In molok sin nane min oni kun, ale sa' le anbi in nahelan. Hoi fetnai-fetnai Yerusalem, in le au nek ani ma au sob leko in masan onane.