Read Uab Meto KIDUNG AGUNG 6 Bible Online

KIDUNG AGUNG 6 - Uab Meto bible

KIDUNG AGUNG 6

¹In le hom nek mani in nao nok me ka? Hoi bae feto amasat anesit? In le hom nek mani in nao nok me ka, he nati hai mok mani in?

²In le au nek ani es in lene, es in lene bonak he nati natuk in bibi kase sin anbi in lene, ma naiti uk-uki in sufan.

³Au le i in le au nek ani in ini, ma in le nane au ini kun, in natuk in bibi kase sin anbi uk-uki sin sufan nanan.

⁴Ho mumas, au min oni, ho masam on kot Yerusalem, ma Tirzah. Hom futman ale nekaf, onle to meo pa'e nok in pen-pene.

⁵Amkoit kau, natuin ho kisot nane naneku au nekak. Ho nakam funun onle bibi puknes le ansanu natuin tubu Gilead.

⁶Ho nisim muti onle bibi kase puknes le fe an eu sin ma naniu sin; anpasnok onle bibi kase le ankuan sin, ma kan mu'i fa esle' he namneku.

⁷Ho kun-kunun onle atpolo atbati lin kase fua mese, na'tolo' anbi nui mataf sin pinan.

⁸Maski nak anmu'i kato bo'ne, ma fetnai sin bo' fanu, ma bae feto sin namfau,

⁹alkun mese au kol ot kase, le au sali, le feot mese le in ainaf an nek nani. Fetnai sin nit ma anpules in, ma fetnai kliko sin naskek.

¹⁰Sekau es amnemat nane onle manas in pinan, masan onle funan na'tem, ma pinan onle manas? In nahelan onle pukan meo pa'e nok in pen-pene.

¹¹Au aum neu lene fenu, ma kiso ale tuna anbi mnela; oni tua min kase anmu'i in sufan, ma lin kase nasuf.

¹²Au sali ma lomi au nekam maliaba, onle au sali he nati' sae anbi aklet makenat ok ale usif-usif sin.

¹³Mibso' nai hoi bae feto Sulam, amfun mitef nai he nati' hai mimkak.