Read Uab Meto KIDUNG AGUNG 7 Bible Online

KIDUNG AGUNG 7 - Uab Meto bible

KIDUNG AGUNG 7

¹O, bae feto amasat, ho haem nane mas le'uf leka hom pake pen haef. Ho haem in li'an fani on bale amasat, le atoni apakaet es anmepu nani.

²Ho usam nane onle klas mninut le tua min kase maselo kan saun nit fa. Ho taim nane onle ane kase ma nibun anfun natef uk-uki in sufan.

³Ho basam nane onle lus ana nua, ma bibi fui le ankuan sin.

⁴Ho neom nane onle baki lape le anmoe na'ko nit molo. Ma ho matam nane onle nifu-nifu abit Hesybon, anhaumak eno besi naek Batrabim. Ho panam nane onle fatu lape anbi Tubu Libanon le anbaina neu kot Damsyik.

⁵Ho nakam nane onle Tubu Karmel, ho nak funfenu malema onle memtasa piut, nahelan maski nok kesel mese.

⁶Namneo ho amasat ko, le au neka nesin anbi le au lomi sin atnanan.

⁷Ho aom nane nahelan onle pet fui, ma ho basam nane onle hau fuaf manibun.

⁸Au lomi he nati' au sae neu pet fui, ma seu in fuan. Ma upeni in fuan, in snasan nane fomeni onle koi kase.

⁹Ho fefam nane min oni onle tua min kase. Maut he nati' tua min kase nane ansai neu in le au nek ani ma ka natfek nit fa ma nafena in nek maliaba ma neu atoni-atoni atunas amsa.

¹⁰Au le i in le au nek ani in-ini kau ma in anlomi kau.

¹¹Aum he hit atnao neu mnela naimnuke, ma hit tup anbi lene anbi hau suf maliaba sin atnanan.

¹²Aum het nao neu lene anbi nok-noka, he nati atkiso neu tua min kase nasuf ai fe kahaf, ma in sufan anbo; ai lin kase nane nasuf nalali ka? Anbi nane of au fe neu ko au nek maliaba.

¹³Hau bubuk nane anfomen, anbi hit eno anmu'i hau fua aminat, le anseu nani lo ma le fe anseu, nane au utiab sin neu ko au naimnuke.