Read Uab Meto KIDUNG AGUNG 8 Bible Online

KIDUNG AGUNG 8 - Uab Meto bible

KIDUNG AGUNG 8

¹Ah, oni bait ho het ma oil-tatan, ma au ainaf es nasusu kit, namneo au nek ko leka au ueku ko anbi lanan ma kan mu'i fa es he nasi'u ai naakan kau.

²Of au eki ko neu au aina in ume he nati ho munoina kau. Of au u inut ko tua min kase fomeni, ma oe na'ko lin kase in fuan.

³Ho nukum li antuntaku kau, ma hom ho kau meki ho nimam a'ne'u.

⁴Amanta'en nai, hoi fetnai-fetnai Yerusalem, nak of hi ka mile'un fa au nek maliaba talantia au usopu nek malinat.

⁵Sekau ka es nem na'ko mnela snaen, ma an sonlaiton neu in le au nek ani? Au ufena ko na'ko koi kase in kupun, bale naapus ko ma nahonis ko anbine.

⁶Amo'e kau anfani fenai le hom nek in, kais hom ho amteni esle' teta na'ko kau; natuin maliaba nane matanin on lasi maten ma salit nane ankuas onle lasi maten. In sinen onle ai in pinan naek.

⁷Oe naek of kan siuf namaet fa nek maliaba ma oe sako of kan bobok nani fa. Leka atoni mese anfe in a maus le in anmu'i he nati' ansos maliaba, namneo of in napeni akan ma si'u.

⁸Hai olif nane anbife le in basan fe nabau. Of hai moe sa' neune leka anmu'i esle' nem he nati antoti in?

⁹Oni bait in fani on baki lape of hai mihakeb fatu elak na'ko noni muti anbi in tunan. Oni bait in baki hau, oni haim eka in meki hau ayo.

¹⁰Au le i baki lape kau ma au basak nane fatu elak. In le au nek ani nahin nak anbi in of au umlil.

¹¹Nai Salomo anmu'i len tua min kase anbi Baal-Hamon; lene nane in nana'at neu apaot sin. Es-es anbaen noni muti nifun mese neu lene in nesan,

¹²ma es-es napeni noni natun nua anfani on sin haet. Maut he nati' noni nane neu ko, Salomo, ma neu ho apaot sin. Mes anbi au matak len tua min kase, nane au in-ini kun.

¹³Hoi, ho amaika abit lene, hi soba sin anlomi he nen hi hanam, es nanet munenab neu kau amsa.

¹⁴Au naimnuke, aum nai onle bibi fui, onle lus ana anbi tubu-tubu Beter.