Read Uab Meto YESAYA 1 Bible Online

YESAYA 1 - Uab Meto bible

YESAYA 1

¹Sulat i nahenu nok a'at antom Yehuda ma Yerusalem le Uisneno naton neu Nai Yesaya, Nai Amos anmone, leka Nai Uzia, Nai Yotam, Nai Ahas ma Nai Hizkia nanaoba plenat anbi Yehuda.

²Amnen nai hoi neno kuni peni, mitnin nai hoi pah pinan! UISNENO nakua a'an nak, “Anah-anah le Au panat sin, sin anlaban Kau.

³Bijae nahin in tuan, bikase luke mnanu nahin in bale mnahat le in tuan naloitan neune. Mes Israel Au to ka nahin fa; sin ka nahin fa nok lek-leko.”

⁴Amle'ut neu ki to asanat, atoni-atoni amle'ut ma amaufinut! Hi mofu milali ambi amle'ut natuin ale hi sanat-sanat sin. Him tite milali UISNENO ma him koti Uisneno Knino le'uf le mes hi he miluli ma mibes meune.

⁵Nansa' hi fe masuli piut? Him lomi ka hen fe neu ki kasat mafena nesi anteni ka? Hi nakam nahenu nok papa', hi nekam ma hi tenab namen.

⁶Na'ko hi nakam talantia hi haem nanan katit fa aomina anbi hi aom. Hi aom anfu'un ok-oke, anfokel ok-oke, ma napapa' ok-oke. Hi papa' ma hi nu'e sin hi kam boe fa sin ma fe kam amu fa sin, ma fe kam ha'lule fa sin meki mina.

⁷Nale'un nalali hi pah; ale hi kot sin notu nani sin ok-oke. Atoni anao amnemat naiti hi pah anbi hi matam ma naskuku nale'un nani ok-oke.

⁸Al Yerusalem es fe nabalah, mes on kot le an amu nan in ma kan tao ma kan mo'e fa sa'-sa', on a'sane anbi lene tua min kase ai on la' anbi lene oka-timu.

⁹Kalu onle UISNENO Akuasat Afinit ka nafetin fa atoni fauk-fauk neu kit, hit tamle'u talali ok-oke, onle Sodom ma Gomora.

¹⁰Yerusalem, ho atukus ma anonot sin anfani onle atoni Sodom ma Gomora. Amnen nai sa' le UISNENO he naton neu ki; mitnin nai plenat Uisneno le In he nanoina neu kit.

¹¹UISNENO nakua a'an nak, “Oni ho mutenab mak Au lomi ho fua tulu le ho mutulu neu Kau piut-piut? Au lenan ho bibi kase fua tulu mnotu sin ma ho bijae tipu in balun nane. Na' na'ko bijae keso, bibi kase ma bibi nane Au ka lomi fa.

¹²Sekau es anlelu ki he hi meki ale fua tulu nane anbi neno hi aim he miluli ma mibes neu Kau? Sekau es anlelu ki he hi mioinsom ambi Au Ume Knino ka?

¹³Hi meki hi fua tulu nane mes in ka maota fa. Au leumai nok in fon. Au neknanan ki ma Au ka lomi fa he kiso ki leka hi miliatas Funan Fe'u, neno-neno Snasat ma neno-neno naek bian ma buat-buat neu lasi knino. Hi mile'un ale lasi nane ok-oke meki hi sanat sin ma in anfani mafena neu Kau; Au hae mate sutai ale lasi nane.

¹⁵Leka hi maiti hi nimam hem onen toti Au ka nen ki fa. Au ka uhin fa neu hi onen totis nane amfaun he onme, Au ka lomi fa he nen hi onen totis, natuin nok hi nimam nane atoni namfau le hi mimate sin.

¹⁶Amboe miknino hi aom talantia naknino. Misnasab nai ale taos mo'et amle'ut le him tao ma anmo'e. Kais amtao ma mo'e amle'ut anteni,

¹⁷minoina nai he mo'e lasi alekot. Mihakeb nai lasi amneot, ma mineku nai lasi hamu'it; amfe nai lasi amneot neu anmanat sin, ma ampesi lasi bife banu sin.”

¹⁸UISNENO nakua a'an nak, “Aim nai he hit taleko lasi i. Maski me' amtasa ki natuin ale hi sanat sin, mes of Au uknino ki talantia hi muti ki on abas. Maski hi sanat sin namfau fa mafena, mes of Au sako polin ani sin.

¹⁹Kalu him lomi he mi'ki meu Kau, of him naben ale sa' alekot le hi pah napoitan in afan neu ki.

²⁰Mes kalu him laban Kau, of hi mate ambi makenat in nanan. Au, UISNENO Kau, ukua ulali Au a'ak.”

²¹Kot le afi ahun-hunut in na'ki, mes muni i in onle bife amapaisa mese! Afi ahun-hunut in tuafen amneot ma nek leko, mes muni i atuas anbi kot nane al atoni a'mate atoni.

²²Yerusalem, afi ahun-hunut nane ho onko noni muti, mes muni i ho ka maupa ko fa anteni. Afi ahun-hunut ho onko tua min kase aminat, mes muni i ho min oe luman ko.

²³Ho ana' aplenat sin anlaban ma sin anfani haef nimaf abakat; sin anlomi hen simo sa' le anfe neu sin ma sin anlomi hen simo noni poh fefaf. Sin kan lomi fa hen pesi anmanat anbi bale lef lasi; ma kan lomi fa he nen han sakoit na'ko ale bife banu sin.

²⁴Es nane te UISNENO Akuasat Afinit, Uisneno atoni Israel nakua a'an nak: “Hoi ale Au musu sin, of Au seunbanin nek masunu neu ki, talantia hi ka misusab Kau fa anteni.

²⁵Au of a'seunbanin ki. Onle atoni naknino noni molo, fun onane Au of uknino ki; ale lahi of Au upoitan ani na'ko ki.

²⁶Au of a'fe teni neu ki ale alef lasi ma afainekat on un-unu. Ma Yerusalem of nakanab nak kot amneot ma aki'at.”

²⁷UISNENO amneot, In of nafetin Yerusalem ma neu in tuafen le sin nate'un.

²⁸Mes atoni-atoni asanat le anlaban In of In nale'un sin, ma sin le nasaitan In of nale'un sin.

²⁹Sin of napeni lasi mae natuin sin anfua neu ale hau ma sin anbeti nateta lene neu ale uisneno teta.

³⁰Sin of anfani on hau naek le in non anmaknene, ma onle lene le ka natam fa oe neune.

³¹Onle ane ta'u anputu natuin ai sabliuf, onane amsa atoni ana' kuasat sin of nale'un sin natuin sin taos sin mo'et amle'ut, ma katit fa es neu he nasnasab kasat nane.