Read Uab Meto YESAYA 10 Bible Online

YESAYA 10 - Uab Meto bible

YESAYA 10

¹Amle'ut neu ki le hi mo'e ale plenat le ka namneo fa neu he mimeku Au to.

²Nok lasi nane hi mikain atoni amamu'it he napeni sa' le sin he napeni ma lasi amneot le sin he napeni, ma hi misik lasi mu'if na'ko bife banu ma li'anmanat.

³Of hi mo'e sa' ka anbi neno Uisneno hen kas ki ka? Of hi hem toti babat na'ko sekau ka? Of hi he mitolo' hi mu'im nane anbi me ka?

⁴Hi monim of al anlolo namate ki anbi makenat in nanan ai anpo'o ki ma amnao onle anheke nan ki anbi makenat in nanan. Mes UISNENO fe nato' ma ankas piut.

⁵UISNENO nakua a'an nak, “Amle'ut neu Asyur! Asyur Au pake on uel ma hau tuka neu ne beso ale atoni le Au to'as antoman sin.

⁶Au sonu Asyur he nati' nape' ma anken Au to le sin nasuan Kau ma le antao Kau ma Au uto'. Au sonu Asyur nasik ma nabak ma anhali naklati Au to on afu anbi lanan.”

⁷Mes kesel Asyur in mu'i kun salit a'teta. Fun in nahakeb anbi in nekan nak in hen pake lasi maputu matani he nale'un nani uf namfau.

⁸In namoko'on ma nak, “Ale au nakaf makenat sin al-al sin kesel ok-oke!

⁹Au usik an kot-kot Kalno ma Karkemis, Hamat ma Arpad. Au usik an amsa kot-kot Samaria ma Damsyik.

¹⁰Au be'u pah-pah le naluli ma nabes neu le'u mahuma ma le anmu'i kuasat anesi na'ko le anbi Yerusalem ma Samaria.

¹¹Samaria ma ale in le'u mahuma sin Au ule'un ulali sin. Of Au tao ma mo'e lasi papmese amsa anbi Yerusalem nok ale le'u mahuma le sin naluli ma nabes neu sin anbi nane.”

¹²Mes UISNENO nakua a'an nak, “Kalu le Au he tao ma mo'e anbi Tubu Sion ma anbi Yerusalem nane Au tao ma mo'e ulali. Of Au fe kasat neu kesel Asyur natuin in lasi moko' ma lasi be'o.”

¹³Kesel Asyur in nauab namo'e, nak, “Ale lasi nane au mo'e eki au kuasat kun. Au nek manoe ma nek ahinet kau. Au uneku ani nakat pah-pah, ma sin mu'in au usik ani sin. On bijae keso au teli ale atoni ana' plenat sin.

¹⁴Uf-uf anbi pah pinan onle kolo kuna; nok manoe au usik ani sin amaus onle atoni an abul teko le nasaitan sin anbi kuna. Katit fa ninef he naspepe, katit fa es hen fai in fefan hen anbai.”

¹⁵Mes UISNENO nakua a'an nak, “Nabe'i ka fani he naliabon nesin atoni le he nafae nekin ka? Ai heo hau he naliabon nesin in le hen heo nekin ka? Hau tuka mese es ka naiti fa atoni, mes atoni es naiti hau tuka.”

¹⁶Natuin atoni Asyur namoko nalali sin aoken, es nane te UISNENO Akuasat Afinit ansonu men le'uf neu hen kas ale nakaf amakenat abe'it sin. Sin of namen men maninit maputu naek on ai le notu sin piut-piut.

¹⁷Uisneno knino, Meusine Israel, of anfani on pina le notu nani ale sa', ma ale kisan ma katila.

¹⁸Ma ale nasi naek ma ale bale maafa anbi pah Asyur of nale'un nani sin ok-oke, on atoni amenat le namen talantia anmate.

¹⁹Ma nasi in haunu of anmoni al u'faukah, talantia li'ana mese amsa of nabe'i anso'i nani sin.

²⁰Anbi neno nane nesif to Israel le nafetnon of sin kan sonlait fa sin monin anteni neu ana' aplenat le al kle'ot nale'un sin, mes sin nana'at sin monin neu UISNENO knino Israel.

²¹Nesif an-ana to Israel of sin nate'un neu Uisneno meo pa'e abe'it.

²²To Israel le sin amfaun onle snaen anbi tasi ninen, of al faukah es of anfani nem. Neno lef lasi UISNENO anhaumaken, ma tebes ma namneo to le nane mes nale'un nani sin.

²³Namneo, pah nane ok-oke UISNENO Akuasat Afinit of nale'un nani sin; nane lasi fekat UISNENO, le ka nabe'i fa he nabaina nani anteni.

²⁴UISNENO Akuasat Afinit nak neu In to le namaika anbi Sion nak, “Kais hi mimtausan atoni Asyur, maski sin nameku ki ma anhamu'i ki on afi atoni Mesir anmo'e.

²⁵Fun ka lo fa anteni Au usnasab Au to'as neu ki, oke te of Au ule'un sin.

²⁶Au UISNENO Akuasat Afinit Kau, Au beso sin eki ua, onle Au unoni atoni Median anbi tubu fatu Oreb. Of Au lefi lasi neu Asyur, onle Au lefi lasi neu Mesir.

²⁷Anbi neno nane of Au ufetin ki na'ko hamu'it Asyur, ma sin of ka naplenat ki fa anteni.”

²⁸Solalus Asyur nasik nan nalali kot Ayat! Sin antanhai nalali Migron! Mnahat ma mninut sin namaika anbi Mikhmas!

²⁹Sin antanhai nalali tlaka ma antup anbi Geba! To kot Rama sin anlilitai, ma to Gibea, kot Kesel Nai Saul, sin naen nasaitan sin kuan.

³⁰Amhunun ma amkoa nai hoi to Galim! Amnen ma mitnin nai, to Laisya! Mitae nai, to Anatot!

³¹To Madmena ma Gebim sin naen natnani.

³²Neno i musu antam nemen anbi kot Nob, ma anbi nane sin nabubu niman ansali Tubu Sion, neu kot Yerusalem.

³³UISNENO Akuasat Afinit of natseleb sin on hau atlaen le nafae nani na'ko hau in un. Le amasat alekot ma amnanut anbine of nafae nani ma nabelat nani sin.

³⁴UISNENO of na'belat sin on hau anbi nasi nanan le nafae sin neki fani. Maski sin nabe'i on hau matani anbi Libanon, sin of natsel amsa!