Read Uab Meto YESAYA 11 Bible Online

YESAYA 11 - Uab Meto bible

YESAYA 11

¹Nai Daud in sufan onle hau uf mese le nafae nalali. Mes onle tuklua le nasuni ma napae fun snuk fe'u anbol na'ko in a ba'an, onane amsa kesel mese of nem anbol na'ko Nai Daud in sufan.

²Kuasat UISNENO of nok in ma antuntaku in, talantia in anmu'i nek tenab ma nek matalun nok nek mahine, in naiti lasi fekat ma nanaoba nani; in nahin Uisneno In lomin ma namtausan In.

³In lomin nane esle' natuin UISNENO In lomin. In of anlefi lasi ka natuin fa al In ankiso onane ai ka natuin fa sa' le In nen na'ko atoni bian.

⁴In of anlefi lasi neu atoni amamu'it sin nok amneot, ma In of nafek lasi neu atoni asutai hamu'it sin natuin amnonot; atoni asanat sin In nafek sin lasi natuin In aplenat, ma atoni anmo'e amle'ut In nateku sin.

⁵In nafek lasi nok amneot ma aki'at.

⁶Asu fui of natua nabua nok bibi kase, ma asu fui knatan of natua nabua nok bibi sin. Bijae ana' ma meo asu ana' of sin nekun nabua naba', ma li'ana mese of anpo'o sin.

⁷Bijae ma asu le'u of nekun nabua naba', ma sin an en of antup nabuan. Meo asu neku ane ta'u on bijae.

⁸Ma anesi na'ko nane li'ana mese of ka sa'-sa' fa leka in namaika anhaumak kaun laso.

⁹Anbi Sion, Tubu Knino Uisneno, of kan mu'i fa amle'ut ma le he nale'un. Pah nane of nahenu nok lasi mahine neu Uisneno, on oenu ankub nan tasi.

¹⁰Of anbol anbi neno nane kesel mese na'ko Nai Daud sufan of ale pah ankiso na'ke neu In. Sin of nem neu In, ma sin of anpules sonaf amasat In bale maika nane.

¹¹Anbi neno nane UISNENO of hae mese anteni anpake In kuasat he nati' napoitan In to le fe namaika anbi Asyur ma Mesir, anbi pah-pah Patros, Sudan ma Elam, anbi Babel, Hamat ma pah-pah a'lot sin.

¹²UISNENO of nahakeb pen-pene mese neu ale pah-pah. Nane anfani a'taka nak In nibun nabuaba nafani to Israel ma Yehuda le nasitbon anbi pah pinan ma neki sin anfani neman.

¹³Plenat Israel of ka nek menan fa Yehuda, ma Yehuda of ka nek menan fa Israel.

¹⁴Sin of nabuan nape' ma anken atoni Filistin bi neno tesan ma sin of nasik uf-uf anbi neno saen. Sin of nis ma anbe'u Edom ma Moab, ma Amon of naluli neu sin.

¹⁵UISNENO of na'meti tasi Anonof Suez. In mes anmo'e sin anin maputu anfu nok matani talantia Noe Efrat bation fani noe ana hitu, talantia es-es nabe'i anlak nani neki peni haef.

¹⁶Neu In nonot sin le fe namaika of anmu'i lan opa neu sin hen poi na'ko Asyur, on afi Israel anpoi na'ko Mesir.