Read Uab Meto YESAYA 13 Bible Online

YESAYA 13 - Uab Meto bible

YESAYA 13

¹I han ba'an Uisneno, le Nai Yesaya Nai Amos anmone ansimo antom Babel:

²Mihakeb nai pen-pene makenat anbi neten tun monas! Amhunun nai neu ale solalus sin, ma maiti hi nimam nai he nati' sin nape' kot abe'ot nane.

³UISNENO no'en nalali In meo pa'e mabeti sin. Sin le nane abe'it ma matani, sin ka namtau fa ma neki nek alomit neu kit. UISNENO anfe sutais neu sin he nakas atoni-atoni le antom in to'as.

⁴Amnen nai slutuf anbi nu'af, hanaf on to tepa naek. Hanaf on slutuf plenat-plenat ma uf-uf le nibun nabuabon. UISNENO Akuasat Afinit In neknon nono ma antae to meo pukan neu makenat.

⁵Sin nem na'ko pah lalob na'ko neno in tu'an. Anbi In to'as UISNENO anpake sin he nale'un pah pinan ok-oke.

⁶Him kae nai, natuin neno UISNENO anhaumaken, neno amle'ut na'ko UISNENO Akuasat Afinit.

⁷Mese-mese of in naben in niman an ole ma in nekan matani nane namneku.

⁸Lasi amtaus anae le'uf of antoman sin, ma mes sin napeni menas ma manane nane onle men mahonit le bife he nahoni. Of sin anmakison es nok es nok nek biusmai, sin humken me' natuin sin anmae.

⁹Neno UISNENO in of nem, ma anbi neno nane UISNENO anpolin In to'as ma In maunu maputu. Pah pinan of anfani pah hufui ma ale atoni asanat of namle'u.

¹⁰Ale afkun ma afkun le anpuknok of sin pinan nane nasnas, manas of namesok leka in ansae, ma funan in meusine of kan pin fa.

¹¹UISNENO nakua a'an nak, “Of Au fe kasat neu pah pinan natuin ale sin lasi amle'ut ma neu ale atoni amle'ut natuin ale sin sanat. Ma ale atoni a'moko of Au ubaun sin, ma atoni abe'ot amaufinut of Au kas sin.

¹²Atoni le nafetin sin ka namfau fa, sin maupa nesin noni mnatu.

¹³Of Au mo'e neno tunan anlilitai ma pah pinan nabeko piut na'ko in balan anbi neno Au, UISNENO Akuasat Afinit, Au ulile ma uton Au to'as.

¹⁴Atoni neno amnemat le sin natua anbi Babel of sin nasitbon ma nasanon ma es-es te naen anfani kun neu in pah. Sin on lus le naen na'ko ali'ut le anli'u sin, ai on bibi kase le kan mu'i fa atukus.

¹⁵Fun le anheke nan sekau of napau in talantia anmate.

¹⁶Sin of ankiso ma na'et neu nale'un sin anhenu, nasik ma antet sin ume, ma anmo'e nale'un ale sin fenai.”

¹⁷UISNENO nakua a'an nak, “Au ufena uf Madai he nape' Babel. Kan poh fef nabe'i fa sin neki noni muti ma mnatu.

¹⁸Sin namate atoni-atoni munif neki aklaot ma as'anef. Sin ka nek fa ale li'ana susu sin ma ka namnau fa ale li'ana sin.

¹⁹Na'ko ale aplenat, Babel nane es mas le'uf kun ma anfani nek alomit neu In to. Mes Au, UISNENO, of uskuku ani sin, onle Au tao ma mo'e Sodom ma Gomora.

²⁰Katit fa atoni mese amsa le he natua anteni anbi nane. Katit fa atoni Arab anaot le he nahakeb anteni um-ume anbi bale nane, ma katit fa atukus le he neki sin bibi kase neu he neku naba anbi bale nane anteni.

²¹Mu'it-mu'it le anfui of natua bale nane. Sin ume sin of nahenu nok kutlu ma atois, ma kolo pui naek of natua anbi nane. Ale bibi fui of ansaika lili anbi kefan le natkua.

²²Asu fui ma meo asu ankonon ma sin han kenu ansae natef kot-kot ma sonaf-sonaf Babel. Neno le he nale'un anhaumaken ma in tabu ka natnanib anteni fa.”