Read Uab Meto YESAYA 14 Bible Online

YESAYA 14 - Uab Meto bible

YESAYA 14

¹UISNENO of In nek namnau Israel In to, ma anbeti anteni sin anfani In ini sin. In of anfe sin natua nafani sin pah. Atoni anao amnemat of nem neu sin ma nabua nok sin.

²Uf namfau of anbab Israel neu he nati' sin anfani neu sin pah le UISNENO anfe nalali neu sin, ma anbi nane ale uf-uf of sin aetnon neu Israel. Israel of anheke atoni-atoni le afi anheke sin naplenat atoni-atoni le afi naplenat sin.

³UISNENO of nafetin to Israel na'ko in menas ma in susal, ma na'ko mepu mafena le naseke sin neune.

⁴Leka UISNENO antao ma anmo'e lasi nane, sin nasi'u kesel Babel nak on i, “Kesel amaufinut nane anbel nalalien! In kan hamu'i anteni fa.

⁵UISNENO nasopu nalali ana' aplenat akuasat-akuasat amle'ut

⁶le nok to'as in nateku uf-uf ma anhamu'i sin piut-piut.

⁷Namuni te ale pah pinan ok-oke of nahenu nok halan ma tainine, ma mese-mese of ansi nok amlilat.

⁸Fun anpupu ma aijob Libanon namlil natuin kesel amaufinut nane anbel nalalilen, ma leka in anao nalali, katit fa esle' hen lelu he nafae sin!

⁹Plenat nitu anbi pah pinan sin ok-oke ansenu kesel Babel nane. Sman nitu na'ko atoni-atoni ahunut le afi sin ana' aplenat anbi pah pinan, ma sman nitu na'ko ale kesel sin anfen na'ko sin a'toko.

¹⁰Sin al-al sin anhunun ma ankoa neune nak, ‘Hoi! Muni i ho amsa onle hai, am ole ma ka mube'i fa!

¹¹Afi ahun-hunut sin natola ko neki bae heo in hanan, mes muni i ho amsa amtam ambi bale atoni amates nok a'ten-tena. Ale kauna anfani ho bale tupa ma klua ma sibe anfani ho mau tainusat.’

¹²Hoi kesel Babel, afi ahunut ho faif nome apinat ko, mes muni i ho mofu mulalien mu'ko neno atnanan! Afi ahunut hom be'u ale pah-pah, mes muni i anbeson natupa ko anbi nain.

¹³Hom senan anbi ho nekam hem sae meu neno tnanan ma ho hem tao ho toko anbi afkun amnanut sin tunan! Ho mutenab nabe'i ho amtoko on kesel anbi nu'af bale uisneno teta sin nabuan anbi aon bian a'ne'u.

¹⁴Ho mumolok, mak of ho amsae meu nope amnanut ma ho amfani on Anesit Afinit.

¹⁵Mes anpolin natam ko neu bale bola mnanu na'ko bale atoni amates.

¹⁶Sin abit bale nane sin of ankiso na'ke ko. Sin of natoti nak, ‘Ait in kun es atoni le i le anmo'e pah pinan nabeko ma anmo'e ale aplenat sin anlilitai ka?’

¹⁷Ait in es ka nale'un fa kot-kot ma le nabaina pah pinan anfani mnela snaen ka? Ait ka in fa es ka nafetin nit fa atoni-atoni le anheke nan sin ma ka nafetin sin he sin anao anfani ka?’

¹⁸Ale pah-pah sin kesel sin ansenan sin ma anbebin sin nok mas apinat es-es anbi in naukel,

¹⁹mes ho ka mu'i fa nitu nate; ho aom nitu sin anpolin onle sin antite tol-fe'u mainisit, sin ankub ho aom nitu neki amakenat sin aon nitu le anmate anbi makenat, ma anpolin nabuaba sin anbi bola fatu in nanan, on punu le anhali naskuku nani.

²⁰Ho mule'un mulali ho pah ma ho mumate mulali ho to. Es nane te of kan sub ko fa on kesel bian sin. Katit fa es na'ko ho sufam amle'ut nane le he napeni aomina.

²¹Sin hen fatan malolot nok labah! Ho anmone sin of anmate natuin sin amaf sin mo'et amle'ut. Katit fa es na'ko sin le he naplenat anbi pah pinan ai he nafena ale kot.”

²²UISNENO Akuasat Afinit nakua a'an nak, “Au of upe' Babel ma uneku ani in. Katit fa es amsa le he napeni aomina, ma ale sin anah-anah sin amsa of ka napeni fa honis. Au UISNENO Kau, Au es ukua ulali Au a'ak.

²³Of Au mo'e Babel anfani nifu homa, kutlu ma atois of natua anbine. Babel of Au na'ko ma pik ani knino. Au, UISNENO Akuasat Afinit, ukua ulali au a'ak.”

²⁴UISNENO Akuasat Afinit In ansup nak, “Sa' le Au ufek ulali nane namneo-namneo of Au unaoba ani.

²⁵Atoni Asyur le anbi Au pah Israel of Au ule'un ani sin, ma le anbi Au tubu-tubu sin of Au hali uklati ani sin. Au of mufetin Au to na'ko mafena ma na'ko baut le atoni Asyur naseke neu sin.

²⁶Au lasi fekat esle' i neu pah pinan; ma of Au nukuk nenuon neu hen kas pah-pah.”

²⁷UISNENO Akuasat Afinit nafek nalali he nati' antao ma anmo'e onle nane. In nenu In nukun neu hen kas, ma katit fa esle' he nakain In.

²⁸I han ba'an le naton nalali anbi ton Kesel Nai Ahas anmate.

²⁹Hoi uf Filistin, hau tuka le anpake hen beso ko naiti anpolin nalalien. Mes kais ho mumlil, natuin kaun koko es anmate, kaun koko anesit mese of anseka nani, ma kaun koko in teko of anliki ma napoitan kaun koko manine.

³⁰Amnahas a naek of anbol nem neu ki, ma atoni le fe namaika of anlolo namate sin. Mes, atoni na'ko to UISNENO le anmamu'i anmate of napeni mnahat, ma atoni le kan mu'i fa be'it ma matani of anmoni nok tainine alekot.

³¹Amkae nai, ma amkoa nai hem toti babat, hoi kot-kot Filistin! So nati' hi al-al ki amlilitai nok amtaus! Nope afu skuku ansae nem na'ko aon bian a'ne'u anfani taka' neu musu nemen; katit fa amtaus anbi sin.

³²Hit of he tatae tak sa' ka neu haef sin le nem na'ko Filistin? Hit of tamolok neu sin tak UISNENO nafena nalali Sion, ma In nonot sin of napeni neot ma hafot anbi nane.