Read Uab Meto YESAYA 16 Bible Online

YESAYA 16 - Uab Meto bible

YESAYA 16

¹Na'ko kot Sela anbi mnela hufui, uf Moab ansonu bibi kase ana he natnat nani neu ana' aplenat anbi Yerusalem.

²Atoni-atoni Moab anpao anbi Noe Arnon in ninen fun sin naoinsok nok nekaf le namneku onle kolo-kolo le anli'u sin na'ko sin kuna.

³Ma sin nak neu uf Yehuda nak, “Muton kai nai sa' le of hai he mo'e. Hom fani aninit tainine neu kai anbi manas maputu neno namtetu, ma mautu nai he hai mitua anbi ho neom Ho mafom. Hai le i atoni le natnanib kai; mutolo' kai ma kais am aneb kai.

⁴Mufetin kai he hai mitua ambi ho pah on atoni anao amnemat. Munini kai na'ko atoni-atoni le he nale'un kai.” (Lasi hamu'it ma lasi le'uf of namsopu, ma atoni-atoni le he naskuku ma anhamu'i pah Israel of namneku.

⁵Namuni te atoni mese na'ko Nai Daud in sufan of anfani kesel, ma in of naplenat in to nok lasi manekat ma aki'at. In of nahakeb lasi amneot ma nok manoe in anfen ma nanaoba lasi amnonot.)

⁶Oke te uf Yehuda nak, “Haim nen milali neu Moab in a'mokon. Hai mihin neu sin neka naebok ma anbe'ok. Sin uab luman ma ka manesa fa.”

⁷Es nane te maut nai he nati' Moab ankulu ma ankae es neu es. Maut nai he nati' sin ankae leka sin namnau nit mnahat aminat le afi sin nah anbi kot Kir-Hareset. Maut nai he sin panet ma fnekat nane namneku ma natlak sin lasi.

⁸Sin afu meto le anhaumak Hesybon ma sin lene tua min kase Sibma nale'un nalalien, sin lene alekot le sin napeni tua min kase alekot na'kone neu ale ana' aplenat le antao ma anmo'e sin anmafu nane amsa nale'un nalali sin. Afi ahunut lene-lene tua min kase nane menuan nem antia kot Yaezer; ma anao nok neno saen nem antia mnela snaen, ma na'ko aon bian a'li nem antia Tasi Maten in aonbin.

⁹Muni'i au kae neu tua min kase Sibma onle au kae neu Yaezer. Au umofu au matnu neu Hesybon ma Eleale, natuin sin pah in afan musu nah nani oke.

¹⁰Katit fa atoni mese amsa le he namlil ma namoke anbi lene tua min kase maafa nane. Katit fa a'baf ai a sit anbi lene tua min kase. Katit fa ameput le hen mepu tua min kase in fuan he napeni tua mina amtasa. Au usnasab ulali sin han hunu amlilat nane.

¹¹Au nekak ansakoi ma noenani neu monit Moab ma Kir-Heres.

¹²Atoni Moab nasusbok nok matani ma ansae neu neten tulu tnatas sin bale luli besa hen onen toti, mes kan mu'i fa in upan.

¹³Nane a'an le afi UISNENO natiaba nani antom Moab.

¹⁴Ma muni i UISNENO nakua a'an nak, “Namneo ton tenu anteni, ale mu'if na'ko Moab le in naliabon nokan of namneku. In to le namfau of al akle'-le'o ma sin ka nabe' in fa.”