Read Uab Meto YESAYA 17 Bible Online

YESAYA 17 - Uab Meto bible

YESAYA 17

¹UISNENO nakua a'an nak, “Damsyik of kan fani fa kot anteni, mes in al anfani on fatu tutnae.

²Kot-kot anbi Siria of naen nasaitan sin talantia nabal-bal ma anfani mu'it in bale; katit fa es neu hen li'u sin.

³Israel in neon in mafon of namneku ma Damsyik in aosona namneku. Atoni Siria fauk le fe namaika sin anmoni anbi kle'at on atoni Israel. Au, UISNENO Akuasat Afinit Kau, Au ukua ulali Au a'ak.”

⁴UISNENO nakua a'an nak, “Leka neno nane in nem antia mas apinat Israel of namsopu ma in alekon nane of namneku.

⁵Israel of on lene anbi Refaim le an abul nani in ane kase ma al nahena akle'o.

⁶On bub fua mina le anseu nani in fuan, ma al nahena papu fua fauk anbi hau atlaen in a'pupun, onane amsa anbi Israel of nahena al atoni fauk es napeni aomina. Au, UISNENO, atoni Israel sin Uisneno, Au ukua ulali Au a'ak.”

⁷Anbi neno nane of atoni anfani nem ma anbaisenu neu in Alikin Ape'an, Uisneno knino Israel.

⁸Sin of ka napane ma ka nafnek fa anteni neu sa' le sin antao ma anmo'e nani, esle' ale baki tulu bale sin notu atu fomeni, ma le'u mahuma-le'u mahuma uisneno teta Bife Asyera.

⁹Anbi neno nane, kot-kot Israel le anpao sin nok matani of natkua ok-oke ma tena maten, onle atoni Hewi ma Amori le sin naen nasaitan sin kot leka sin naen nafetnok na'ko atoni Israel.

¹⁰Israel, hom nikan mulali ho Uisneno le nafetin ko, ma naneo ma nahafo ko, on tubu fatu matani. Mes, Hom sen mulali ale lene sin neu ale uisneno teta.

¹¹Mes maski luat nane anmoni namlia ma nasuf anbi neno le hom sen, mes of kan mu'i fa in fuan. Le anmu'i anbine al susal ma menas le ka namneku fa.

¹²Uf-uf abe'it sin fe naslutu; sin hankenu naslutu on tasi a'lun.

¹³Sin anao mat on noe sako matani. Mes Uisneno ansali sin, oke te sin naen neu bale a'lo. Anli'u sin onle anin anfu ane ut ai onle nautus anfu afu skuku.

¹⁴Anbi tabu manas antes sin neki hakataus matani, mes leka manas anpe' sin namneku. Nane monit atoni mese-mese le nasik hit a'maus.