Read Uab Meto YESAYA 19 Bible Online

YESAYA 19 - Uab Meto bible

YESAYA 19

¹I han ba'an antom Mesir. UISNENO ansae neu nope akeot ma nem neu Mesir. Ma ale le'u mahuma Mesir anlilitai anbi In human In matan ma atoni Mesir sin nekenu namnoe.

²UISNENO nakua a'an nak, “Au of ufena makenat ma Mesir of anmakenan mafani anan: Olif anlaban tataf, kuan anlaban kuan, kot anlaban kot ma plenat anlaban plenat.

³Au of a'eka salit ma bekot Mesir ma Au ipu ani sin nek makoe. Sin of antoti babat na'ko le'u mahuma-le'u mahuma, antoti fainekat na'ko ale mnae ma smanaf aamle'ut

⁴Au of una'at ani Mesir neu kesel amaufinut mese le naplenat sin neki maufinu. Au UISNENO Akuasat Afinit Kau, ukua ulali Au a'ak.”

⁵Oe Noe Nil of ansanu ma namuni te anmeti anfini.

⁶Oe nimaf-oe nimaf of nafo' leka oe ansai hen meti. Niupsai' ma naba of anmaknene.

⁷Ale ane ana le namonib sin anbi lule anbi Noe Nil in ninen anmeto anmate oke te anin anfu anpolin.

⁸Ale aheke ika le sin anheke ika anbi noe nane of sin nanoi ma ansakoi natuin sin tanu ika ma sin tifkai ka maota anteni fa.

⁹Sin al sin nok atoni le ansebe sin of sin moni nok nek susal ma sin nek makoe namneku.

¹¹Namneo atoni Zoan sin kesel sin amonot! Mesir in atoni nek amanoet sin anmafainekan es nok es nok nek amonot! Sin nabe'i nak neu kesel sin nak atoni-atoni mahine sin sufan es sin ma kesel ahun-hunut anmone es sin.

¹²Hoi, Kesel Mesir, es me ka kesel in afainekat-afainekat mahine sin? Oni sin nahin neu sa' le UISNENO Akuasat Afinit hen tao ma anmo'e neu Mesir.

¹³Ale kesel Zoan ma Memfis nane sin atoni amonot. Namneo sin ka kesel fa, sin es nasekeb sin to.

¹⁴UISNENO es anmo'e sin talantia sin anfe fainekat le naonib nekaf. Talantia nok nane Mesir ansan piut, sin naen onle atoni amafut talantia sin antikobi ma ankuku sin lo'at.

¹⁵Anbi Mesir katit fa esle' fe he nabe'i, he ana' aplenat ai he to, ai he atoni atomatas ai he to ana.

¹⁶Of antia in tabu uf Mesir anfani onle bife alilitais ma amtaus. Sin anlilitai nok amtaus leka sin nit UISNENO Akuasat Afinit naiti In niman neu hen kas sin.

¹⁷Pah Yehuda anfani askeket mese neu Mesir leka namnauba sin neu fekat UISNENO Akuasat Afinit antom sin.

¹⁸Anbi tabu nane kot nim anbi pah Mesir of sin nauab neki a'at Ibrani. Atoni-atoni anbi nane ansup neki kanaf UISNENO Akuasat Afinit. Fun kot mese of nakanab nak “Kot Manas”.

¹⁹Anbi neno nane anbi pah Mesir in atnanan of anmu'i baki tulu mese neu UISNENO, ma anbi nakat in ninen anmu'i ni fatu mese le nahakeb neu UISNENO.

²⁰Baki tulu ma ni fatu nane anfani taka' neu UISNENO Akuasat Afinit anbi pah Mesir. Leka pah nane napeni hamu'it, ma sin anbai ma antoti babat neu UISNENO, In of ansonu neu sin afetin mese neu he nati' nafetin sin.

²¹UISNENO of natonon neu Mesir, ma sin of nahin In ma naluli ma nabes neu In, ma neki fua tulu neu In. Ma sin of naboni sin fefkenu neu In neki supat ma nanaoba nani.

²²UISNENO of nanoina Mesir, mes namuni te of In naleko sin. Sin mes anli'on neu UISNENO, ma of In nen sin onen totis ma naleko sin.

²³Anbi neno nane of anmu'i lan opat na'ko Mesir anao neu Asyur. Ma to na'ko pah nua en nane of sin anao neumneman nok lan opat nane ma sin of naluli ma nabes bua'-bua'.

²⁴Anbi neno nane Israel in atokon nane of namnes nok Mesir ma Asyur ma sin tenu sin of anfani tetus neu pah pinan ok-oke.

²⁵UISNENO Akuasat Afinit of anfe neu sin tetus ma nak, “Au fe neu ki tetus, hoi Mesir Au to, Asyur le Au mo'e ani eki Au nukuk, ma Israel Au nonot mabeti.”