Read Uab Meto YESAYA 2 Bible Online

YESAYA 2 - Uab Meto bible

YESAYA 2

¹I a'an Uisneno antom Yehuda ma Yerusalem le Nai Yesaya Nai Amos anmone ansimo:

²Anbi neno-neno amnemat tubu bale Ume UISNENO anhake namnanu ma anhake nahelnon anbi tubu-tubu ma neten-neten sin tunan ma sin fafon. Ale uf-uf sin of anao neu bale nane,

³sin al-al sin namolok nak, “Aim he hit atsae teu Tubu UISNENO, atnao neu Ume Uisneno atoni Israel. In of nanoina neu kit sa' le nabe'i he hit tanaoba. Hit of atnao tatuin In lanan, natuin noina UISNENO nem na'ko Yerusalem, In nakua In a'an na'ko Sion.”

⁴In of anlef lasi neu ale uf-uf, ma nafek lasi neu ale nonot. Of antutu sin suni anfani foi afu, ma sin suni nane of anfani besi lapit. Uf es of ka naiti fa makenat neu uf es, ma of ka naloitan fa neu hen makenan.

⁵Hoi, Nai Yakub in sufan, aim he hit atnao tatuin meusine UISNENO!

⁶Koi Uisneno, Ho musaitan mulali nonot sin, Nai Yakub in sufan! Natuin anbi me-me anbi pah le i atoni anpake le'u mesokan le nem na'ko neno saen ma nem na'ko Filistin. Atoni-atoni sin ansinmak taos mo'et na'ko atoni anao amnemat.

⁷Sin pah nahenu nok noni muti ma noni mnatu, ma sin maus nane katit fa in tu'an. Sin bikase amfaun matani, ma sin aklet kat so'i tabe'i fa sin amfaun.

⁸Ma anbi me-me anmu'i le'u mahuma, sin naluli ma nabes neu le'u mahuma le sin anmo'e neki sin niman.

⁹Es-es of nakle'at ma nanebet nani sin. Kais Hom sako sin sanat koi UISNENO!

¹⁰Ma of sin antam neu nuat nanan anbi tubu-tubu fatu, ai anhani bola' hen tam anbi bola' in nanan he nafetnon na'ko to'as UISNENO ma na'ko In kuasat apinat.

¹¹Atoni nek a'moko of nanebet sin ma atoni le naliabon of na'luli sin. Al UISNENO anmes kun es of naliabon.

¹²Anbi neno nane UISNENO Akuasat Afinit of nanebet ale atoni le nanaeb sin aoken ma ankas ale atoni le namoko'on ma anbe'on.

¹³Ale hau aijob amnanu anbi Libanon ma ale hau naek anbi Basan of nale'un sin.

¹⁴Tubu-tubu amasat ma neten-neten amasat of nanel nani sin.

¹⁵Ale el fatu amnanut ma baki lape of natseleb nani sin.

¹⁶Ale bnao naek abainesit ma le nahum ma namas bainesi of nalema sin anbi tasi nanan.

¹⁷Of nanebet atoni nek a'moko, ma atoni le naliabon of na'luli sin. Al UISNENO anmes kun es of naliaba In.

¹⁸Ale sin uisneno teta sin of namneku ok-oke.

¹⁹Anbi neno UISNENO anfen ma anbeko pah pinan, atoni of sin antam anbi nuat nanan anbi tubu-tubu fatu ai anhani bola' anbi nain he nati' sin nafetnon na'ko to'as UISNENO ma na'ko In kuasat apinat. Leka neno nane in nem antia, sin uisneno teta noni muti ma noni mnatu le sin antao ma anmo'e naluli ma nabes neune of sin nasaitan sin ok-oke onane te ifo ma ba'u es of anpal sin.

²²Es nane te kais hi mipane ma mifnek neu atoni pah pinan le namneku, natuin in ka maupa fa.