Read Uab Meto YESAYA 21 Bible Online

YESAYA 21 - Uab Meto bible

YESAYA 21

¹I han ba'an antom Babel: On anin nautus le naslutu nao nok mnela snaen, onane amsa lasi amle'ut nem na'ko pah hakataus.

²Au upeni mnitas neu ale lasi le anbol nem neki hakataus; neu a'aneb ma amle'ut. Nao mat nai, solalus Elam, amnius man sin nai! Hoi solalus Madai, amfun mitef man sin nai! Uisneno of nasopu nani ale lasi susal le Babel anmo'e nalali.

³Mnitas nane anmo'e au nekak ma naoinson talantia au ka it a teni fa ai au ka nen a'teni fa. Au umtau ma au umen, onle bife mese he nahoni.

⁴Au nekak kan tainine fa; au uskek talantia au lilitai. Fai le au sinmakan al neki lilitais neu kau.

⁵Au it amsa tolas le sin naloitan nalali; sin naloitan bale tokos neu anhone sin. Sin nah ma sin ninu. Mes nok askeken hanaf plenat mese nak: “Hoi ale solalus nakaf! Miloitan nai hi ben besi tika!”

⁶Oke te UISNENO nakua a'an neu kau nak, “Amnao nai ma muhakeb nai apaot mese ma amlelu in he naton neu ko sa' le in nit.

⁷Kalu in nit solalus asae bikase sin nem nua-nua, solalus le ansae bikase luke mnanu ma bikase paha snaen, sin mes hen kiso nalek-leko sin.”

⁸Oke te apaot nane ankoa nak, “Usi, au pao neno-neno fun manas ma fai.”

⁹Kiso, sin es amnemat nane! Solalus asae bikase sin nem nua-nua. Oke te apaot nane naton nak, “Babel natsel nalalilen! Le'u mahuma-le'u mahuma le sin naliatas, naskuku ma nasan'on anbi nain.”

¹⁰Israel Au nonot! Anteli ko ma anhali ko onle ane kase in fuan. Es nane te au utiaba neu ki beno alekot le au nen na'ko UISNENO Akuasat Afinit, Uisneno atoni Israel.

¹¹I han ba'an antom Edom. Atoni ankoa kau na'ko Edom nak, “Hoi, apaot, fai fe a'lo ka? Al tabu faukat anmeon mone?”

¹²Au utae ak, “Of anmeun mone mes mesokan amsa. Kalu hom lomi he mutoti amu nai ma mutoti amteni nai.”

¹³I han ba'an antom Arab: Hoi, atoni Dedan, ho atoni anaot sin nahakeb sin um-ume anbi nasi Arab.

¹⁴Hoi, tuafen pah Tema, mi inut atoni-atoni amenot le sin nem neu ki, ma amfe mnahat nai neu ale atoni le sin natnani na'ko sin kuan.

¹⁵Fun sin naen natuin sin namtausan suni in aikan, ma aklaot akbetas le nalulu an ali sin, ma na'ko makenat manuat mafena.

¹⁶Oke te UISNENO nakua a'an neu kau nak, “Al ton mese anteni mes apinat na'ko Kedar of namsopu.

¹⁷Atoni aklaot pah Kedar amanoet abainesit. Mes al sin faukah es of nafetin sin. Au, UISNENO atoni Israel sin Uisneno ukua ulali Au a'ak.”