Read Uab Meto YESAYA 22 Bible Online

YESAYA 22 - Uab Meto bible

YESAYA 22

¹I han ba'an antom Nonof Lasi Mnitas: Hoi, tuafen Yerusalem, nansa' him sae ok-oke mau ume pupun?

²Ka nabe'i fa he hi amfesat ma mimlil ma mimoke anbi kot ok-oke. Natuin ho amakenat sin anmate anbi makenat i sin kan mate fa natuin mate makenat.

³Ale ho nakaf makenat sin naen ma anheke nan sin leka sin fe ka nafetin fa sin aklaot. Ho atoni abe'it sin anheke sin amsa maski sin naen na'lo.

⁴Kais amkiso kau; maut he au kae ma kulu neu au atoni-atoni sin na'ko au uf le sin anmate anbi makenat. Kais mimela kau.

⁵Namneo, UISNENO Anesit Afinit ma Akuasat Afinit In es natetab nalali neno i on neno taisibu, askeket ma aslutuf anbi Nonof Lasi Mnitas. Kot i ale in baki lape natsel nalalien. Han sakoit toti babat nao natef neten-neten.

⁶Atoni Siria sin nem nok bikase ma aklet makenat, atoni Elam sin nem neki aklaot ma as'anef, atoni Kir sin nabalab sin ben besi tika.

⁷Nonof-nonof maafa Yehuda nahenu nok aklet makenat. Solalus asae bikase anhake anbi eno-eno Yerusalem.

⁸Bale ninit ma pesit Yehuda natsel. Anbi neno nane, him tae ale bale makenat anbi ume le antao sin anbine.

⁹Him kiso mit pe'as namfau anbi baki lape kot Yerusalem le he naleko. Him tae ma amkiso ale ume anbi Yerusalem, him pukai fauk-fauk na'ko sin ma him pake sin fatu neu he mileko lapet kot nane. Neu he mibua oe,

¹¹hi mo'e boni anbi kot ma mibua oe na'ko boni mna. Mes hi kam baisenu fa neu Uisneno natuin na'ko koba In nahakeb nalali ale lasi nane, ma nok nane te ale lasi nane anbol.

¹²Anbi neno nane UISNENO Anesit Afinit ma Akuasat Afinit anlelu ki hem kae nok hana naek, hem eu hi nakam funu ma ampake kalo.

¹³Mes, hi mimlil ma mimoke ma anmo'e fesat. Him lolo bijae ma bibi kase, hi miah sisi ma minu tua mina amtasa ma amkoa mak, “Aim nai he hit tah ma tinu, natuin of noka te hit atmate!”

¹⁴UISNENO Anesit Afinit ma Akuasat Afinit In natonon neu kau nak, “Namneo, of Au ka sako fa ale sin maufinu talantia sin anmate. Au, UISNENO, ukua ulali Au a'ak.”

¹⁵UISNENO Anesit Afinit ma Akuasat Afinit, anlelu kau he utef ok Nai Sebna nakaf apao sonaf, he utiaba neune UISNENO In a'an,

¹⁶“Ho mutenab ho le i sekau ko ka? Ho mu'i kuasat sa' ka talantia hom to'i naukel anbi tubu fatu le i?

¹⁷Hom pantom nai, fun of Au polin ko lo le'uf. Au of hani bola neu ko ma au nunu ko ma tite ko on fatu bubu neu pah a'naek. Anbi nane of ho mate anhaumak ho klet makenat sin le ho muliabom neu sin. Ho mumaeba mulali kanaf na'ko ho usi in ume nanan sin.

¹⁹Es nane te of Au upoitan ko na'ko ho mepu ma of Au usanut ko na'ko ho kanam amnanut.

²⁰Anbi neno nane of Au boin Au ate Nai Elyakim Nai Hilkia anmone.

²¹Ho tainusat anaet ma ho pasu futu of Au fe neu in. Ale ho kuasat of Au fe ani neu In. In of anfani amaf neu Yerusalem ma Yehuda.

²²In of anmu'i kuasat nathoe anbi Kesel Nai Daud sufan. In of ana' letu plenat. Kalu in nasoitan, of es kan ek nabe'i fa, kalu in na ek, of es ka nasoitan nabe'i fa.

²³Ma of Au fe neu in toko plenat le nahel ma namep onle kusat le Au tutu utam ani neu baki lape. Of antola in ume nanan sin ok-oke natuin in.

²⁴Mes in-ini sin ma sin le in ansutai neu sin of neki baut mafena neu in. Sin of naboni sin monin neu in, onle na'i ma tasu le nafiki sin oke neu kusat.

²⁵Leka lasi nane anbol, kusat le ankus natam nalali nok nahel ma namep of kusat nane natkasu ma anmofu. Ma nane leku amsoput neu in-ini sin ma ale atoni le nafiki sin monin neu in. Au, UISNENO Kau, ukua ulali Au a'ak.”