Read Uab Meto YESAYA 23 Bible Online

YESAYA 23 - Uab Meto bible

YESAYA 23

¹I han ba'an antom Tirus. Hoi ale atoni tasi Spanyol le antam ma anao nok tasi, amkae nai nok hanan a'naek! Leka hi mok abnao ma amfani aim mi'ko Siprus of naton neu ki nak kot Tirus namle'u nalalien. Hi kot in un ma hi um-ume sin al-al sin natkua nalalien.

²Mitlak hi lasi nai, hoi to tasi ninen, a'sosa-a'sosa Sidon! Natuin hi es amsonu atoni-atoni alak tasi neu he nasosa ane kase Mesir ma neu he nati' nasosa nok ale pah ok-oke.

⁴Hoi kot Sidon, ho kanaf apinat nane namneku nalalien! Tasi mnanu kan lomi fa anteni, ma nak, “Au fe ka uhoni it fa, ma fe ka unaeb it fa anmone ai anfeto.”

⁵Atoni Mesir amsa of naskek ma naslutu leka sin nen neu nale'un nalali Tirus.

⁶Amkae nai nok hanan a'naek, ma mitnani nai meu Spanyol, hoi to abit tasi ninen!

⁷Amkiso nai hi kot Tirus le in esan na'ko ahun-hunut. I hi kot amlilat ka? I ka hi kot le ansonu atoni hen lak neu tasi bian he naoni anbi nane?

⁸Ai in a'sosa sin ka na'ko fa kesel sin le antola sin bi pah pinan? Sekau ka es naiti lasi fekat neu he namofu Tirus, kot le in kuasat nane nae le'uf?

⁹UISNENO Akuasat Afinit, In es naiti lasi fekat nane. In es nafek neu he nasopu lasi nek a'moko na'ko in to sin natuin sa' le sin nis nalali, ma nanebet ale atoni le napeni kan tola bi pah pinan.

¹⁰Amnao nai mepu ho lene meto, hoi to Spanyol, natuin bnao in bale sonlait katit fa anteni.

¹¹UISNENO naiti nalali In nukun neu tasi ma In nunu ale plenat pah pinan. In anfe plenat he nati' kot-kot Funisia nale'un nani sin.

¹²UISNENO nakua a'an nak, “Hoi kot Sidon! Ho of ka mumlil amteni fa. Sin anhamu'i ho to. Maski sin natnani neu Siprus, sin kan tainine fa.” (

¹³Ka Asyur fa, mes Babel es nafetin kot Tirus he nati' mu'it abulalut naplenat kot nane. Sin amsa es nahakeb al fatu funam natef, anpukai sin kot, ma anmo'e kot nane natsel.)

¹⁴Hi amkae nai nok hanan a naek, hoi ale atoni tasi! Kot le hi amtao hi nekan neune in namle'u nalalien.

¹⁵Anbi neno nane Tirus in manikan ton bo'hitu in a'lon, on kesel mese in ton. Leka batan nane anfini ma ankono, Tirus of on bife mapaisa anbi sit i:

¹⁶Amleko nai heo ma biola, amfun mitef kot nai, hoi bife mapaisa mapolin! Amheo heo ma biola nai, amsi amteni nai, he nati' namnau ko anfani.

¹⁷Leka ton bo'hitu nane namsopu, UISNENO of namnau Tirus, ma nafetin in hen mepu nafani in mepu ahunut. In of nasosa nok ale plenat pah pinan ok-oke.

¹⁸In lasi mnisat ma in upan le in napeni in of ka natolo' fa, mes in of natulu nani neu UISNENO. Atoni-atoni le naluli ma nabes neu UISNENO of sin pake noni nane hen sos bale pake ma mnahat le sin anlomi.