Read Uab Meto YESAYA 24 Bible Online

YESAYA 24 - Uab Meto bible

YESAYA 24

¹UISNENO of nale'un pah pinan, talantia anfani hufui ma tena maten. In of aneusbai nani in human ma in masan ma nasitab nani in to sin.

²Ale atoni ok-oke of naeku nok monit papmese onle nane; ale ana' lasi fuat ma to ana, ate sosa ma ana' mepu, a'sosa ma asosat, tus tuaf ma atusat, ma amu'it ma amamu'it.

³Pah pinan of ansiksakenon ma naskuku nani. UISNENO nakua nalali In a'an, ma lasi nane mes anbol.

⁴Pah pinan anmeto ma anmaknene, pah pinan ok-oke anmasil. Neno tunan ma pah pinan anpakas bua-bua.

⁵Ma pah pinan nalahi natuin tuafen sin antanhai plenat-plenat Uisneno ma sin nabaina ale fef bela ma nasuan lasi manta'en le In anmo'e nok sin talantia nabal-bal.

⁶Es nane te UISNENO ansukat pah pinan ma ankas tuafen natuin sin taos ma sin mo'et. Sin anputu anmate ma al faukah na'ko sin es napeni aomina.

⁷Tua min kase in un anmasil ma tua min kase in oen ka tapeni fa. Atoni le afi ahunut namlil muni i nanoi.

⁸Kat nen a'teni fa heo ma biola sin han amlilat ma a'ke han alekot kat nen a teni fa. Kasul ma a'baf atoni le namlil ma namoke nasnasen.

⁹Sin ka ninu teni fa tua min kase in oen nok sit, katit a teni fa le he naben mninu mafu nok alekot.

¹⁰Kot nane ok-oke anpe' ma namle'u; sin ume maeka oke natuin ume tuafen sin namtau.

¹¹Ale atoni anhunun ma ankoa anbi lanan-lanan natuin sin tua mina mtasa oke. Kan mu'i teni fa amlilat ma amoket anbi pah nane talantia nabal-bal.

¹²Kot naskuku nalalien, ma in eno sin natsel ma nasan'on.

¹³Nane es of anbol anbi pah pinan ok-oke neu uf mese-mese. Papmese onle tabu abul, naiti bub fua mina talantia oke ma anseu tua min kase fuan amsoput na'ko tua min kase in un.

¹⁴Atoni-atoni le napeni aomina of ansi sit nok amlilat. Atoni abit aon bian a'li of sin naton UISNENO In apinat

¹⁵ma atoni abit aon bian a'ne'u of sin anpules ma naliatas In. To abit tasi ninen of naliatas UISNENO, atoni Israel sin Uisneno In kanan.

¹⁶Na'ko pah pinan in tu'an haim nen sit aliatas neu Israel, uf le natuin amneot sin. Mes amle'ut neu kau! Au masil! A'aneb fe an aneb kau, ma lo fe an aneb kau piut-piut.

¹⁷Amnen nai, hoi to pah pinan ok-oke! Lasi slutuf, nopu ma kleot anpao ki.

¹⁸Atoni le naen na'ko slutuf of anmofu anbi nopu, ma atoni le anpoi na'ko nopu of antam neu kleot. Ulan a'naek of ansanu na'ko neno tunan, ma pah pinan in sukin nabeko.

¹⁹Pah pinan anpe', noe nani ma nabeko.

²⁰Pah pinan nabeko neu am nem on atoni amafut, ma nabeko on um-ume le nautus nabeko. Pah pinan natsel natuin sanat in mafenan. In naskuku ma kan fen anteni fa.

²¹Anbi neno nane UISNENO of ankas ale akuasat anbi neno atnanan ma ale kesel pah pinan.

²²Ma of nabuaba sin ok-oke onle atoni le anheke sin bi makenat bi bola' in nanan, ma of natam sin anbi o'of talantia in tabu he nafek sin lasi.

²³Funan of namesok, ma manas of kan pin fa, natuin UISNENO Akuasat Afinit of naplenat on kesel. In of naplenat anbi Yerusalem, anbi Tubu Sion in tunan, ma In naton In apinat neu ale ana' aplenat le naplenat In to.