Read Uab Meto YESAYA 25 Bible Online

YESAYA 25 - Uab Meto bible

YESAYA 25

¹Koi UISNENO, au Uisneno es Ko, au unaeb ma uliatas Ho kanam. Natuin ale Ho mepu sin neki lasi sanmakat; na'ko un-unu Hom lek mani, ma munaoba mani nok aki'at.

²Kot nane Ho mule'un mulalien; kot mabaik lape nane anfani kot atkuas. Sonaf le atoni anao amnemat sin nahakeb nane in namle'u nalalien, ma ka nahakeb anteni fa talantia nabal-bal.

³Uf-uf abe'it of sin nanaeb Ko, ma ale kot pah-pah amaufinut of sin namtausan Ko.

⁴Natuin Hom fani bale neot ma hafot neu atoni a'olet sin, bale tainine neu atoni amamu'it sin anbi malelat. Ho es munini sin na'ko anin slutuf, muhafo sin na'ko manas maputu. Natuin atoni amaufinut nape' kot onle anin slutuf anbi tabu ulan,

⁵onle anin maputu anbi pah snaen. Mes Ho mo'e hai musu sin ka nauab nahin fa, Ho musanab han hunu atoni-atoni amaufinut sin, onle nope nanini naneku manas maputu.

⁶Anbi Tubu Sion, UISNENO Akuasat Afinit of naloitan mei tolas neu uf-uf anbi pah pinan. In nabalab bukae aminat ma tua mina mtasa mabeti.

⁷Anbi tubu nane in tunan In of ansika nope susal le an amu nan uf-uf.

⁸UISNENO Akuasat Afinit of nale'un lasi maten talantia nabal-bal! Of In nose matnu na'ko ale humaf, ma naskotun ale si'ut le In to ansutai anbi pah pinan ok-oke. UISNENO na'uab nalali, ma lasi nane of natonon.

⁹Anbi neno nane of ale atoni of sin nak, “Namneo-namneo, In kun hit Uisneno; In kun le hit athat ma atpao, he nati' In nafetin kit. Namneo, In kun UISNENO; In kun es he hit athat ma atpao In. Neno i leko hit taba' nok amlilat, natuin In nafetin nalali kit.”

¹⁰UISNENO of naneo ma nahafo Tubu Sion, mes Moab of anhali naklati in on ane ta'u anbi maklafu balan.

¹¹In tuafen of nanona sin nimkenu onle atoni le nabha'e. Mes UISNENO of nanebet nek anaeb sin talantia sin kan mo'e fa sa'-sa'.

¹²Kot-kot baki lape Moab le namnanu of natseleb nani ma anpolin sin neu nain talantia naskuku on afu.