Read Uab Meto YESAYA 26 Bible Online

YESAYA 26 - Uab Meto bible

YESAYA 26

¹Anbi neno nane of sin si sit i anbi pah Yehuda: “Namneo hit kot matani kun; Uisneno In neknon kun es nafena In kot, ma In nafetin kit anbi i.

²Misoitan nai eno-eno naek sin, he nati' uf le na'ki sin antam, uf le anmo'e natuin sin Uisneno In lomin.

³UISNENO, Ho es amfe halan ma aomina neu atoni le in nekan nahel, natuin in nateb neu Ko.

⁴Miteb nai neu UISNENO piut, natuin UISNENO naneo ma nahafo kit piut.

⁵UISNENO nanebet atoni a'moko sin; In nale'un sin kot matani, ma nanebet nani namnes nok nain.

⁶Atoni-atoni amamu'it ma anukat of anhali naklati nani sin.”

⁷Atoni amneot anao natuin lanan amneot, natuin Ho, UISNENO, es amhel lanan neu sin.

⁸Hai mituin Ho lasi fekat, koi UISNENO, ma amhat ma ampao Ko; Ho es haim pules Ko ma hai nekam ansinmak neu Ko.

⁹Au smanak ansinmak neu Ko anbi fa-fai, au nekak nami Ko anbi nok-noka. Leka Ho mufek lasi neu pah pinan, pah pinan tuakenu of sin nahin lasi amneot.

¹⁰Atoni amle'ut maski atmo'e teki lasi alekot, in ka nanoina fa lasi amneot amsa. Anbi pah amneot amsa in anmo'e amle'ut, ma kan lomi fa hen simo kuasat UISNENO.

¹¹UISNENO, Ho mubalab hem fe kasat neu Ho musu sin, mes sin ka nahinen fa. Maut he sin namaebok nok labah leka sin nit Ho manekam neu Ho to. Maut he sin namneku oke natuin kasat le Ho mubalab neu sin.

¹²Koi UISNENO, Ho of mubalab halan nekaf neu kai; ale sa' le hai mepu, Ho es amtao ma anmo'e neu kai.

¹³Hai afi kesel bian naplenat kai, mes al Ho es hai miteb neu Ko, koi hai UISNENO!

¹⁴Sin anmate nalali ma of kan moni anteni fa, sin asmanan of kan fen anteni fa. Natuin Ho mule'un malali sin ok-oke ma Hom nose sin na'ko Ho tenab.

¹⁵Hom sato Ho to kai ma hai mimfau, koi UISNENO, ma Ho menuab hai pah, es nane te hai miliatas Ko.

¹⁶Hom kas mulali kai; anbi susal hai mami Ko, ma am onen toti neu Ko, koi UISNENO.

¹⁷Onle bife le he nahoni in nanu'on ma an anbai natuin menas, onane amsa hai ambi Ho humam, koi UISNENO.

¹⁸Hai miapu ma minu'om natuin menas, mes hai ka mihoni fa sa'-sa'; hai kam fe fa aomina neu pah pinan, ma kam sato fa in to.

¹⁹Ho to le anmate nalali of anmoni anfani, sin aon nitu of anfen anfani. Atoni le ansub nalali sin anbi nain of anfen ma anhunun. On akum le anpinis pah pinan, Ho mumonib Ho to le anmate lo le'uf.

²⁰Amtam nai meu hi ume, hoi Au to, oke te am ek hi eno nai. Mitolo' nai anbi smela mese talantia UISNENO In to'as ansanu.

²¹UISNENO of ansanu na'ko In balan anbi sonaf neno tunan hen fe kasat neu to pah pinan natuin sin sanat. Lasi malolot le sin nanaoba nok a'tolo'-tolo' of naton nani. Nain kan kub anteni fa atoni-atoni le anmate natuin malolo.