Read Uab Meto YESAYA 27 Bible Online

YESAYA 27 - Uab Meto bible

YESAYA 27

¹Anbi neno UISNENO of anpake In suni le matani ma nasik hen fe kasat neu Lewiatan, kaun koko le naoinson ma anfutnon nane, he namate kaun le'u na'ko tasi.

²Anbi neno nane UISNENO of nakua a'an nak, “Amsi nai antom Au lene tua min kase amasat.

³Au, UISNENO Kau, Au es apao in, Au pofi in anbi ale tabu, fai manas Au pofi in, he nati' kais nit sa' esle' he nale'un in.

⁴Au ka uto' a'teni fa. Kalu anmu'i naba' ai kisan ma katila Au of uneku ani, ma Au otu ani sin ok-oke.

⁵Mes kalu Au to sin musu-musu sin nami ma nahaofton anbi Kau, maut he sin halan nok Kau, namaut, he sin halan nok Kau.”

⁶Anbi neno amnemat, uf Israel of on hau uf le na'ba fun nasuni ma napae talantia nahenu pah pinan nok ale in fuan.

⁷UISNENO anfe kasat neu In to in mafenan ka onfa onle uf-uf le namusu nok sin. In kan lolo namate fa In to onle In anlolo namate In musu sin.

⁸UISNENO anfe kasat neu In to neki lanan In anpolin sin neu bale teta. In anli'u sin neki anin amle'ut na'ko neno saen.

⁹Mes sanat-sanat Israel nabe'i ansako sin leka baki tulu uisneno teta naskuku nani sin on ao. Ma ale baki tulu mnotu atu fomeni ma taka' uisneno teta bife Asyera mes he naskuku nani amsa.

¹⁰Kot baki lape nane tena maten ma nasaitan nani on mnela hufui luman. Mu'it neku naba anbine ma antup anbi nane ma neku nani hau no' na'ko hau tlaen sin.

¹¹Leka in atlaen anmeto ma nat'ipu, bife-bife sin nem ma nahopi ai neki. To nane ka nahin fa sa'-sa', fun Uisneno Apaket Amo'et of ka nek namnau fa sin.

¹²Anbi neno nane UISNENO of nabuab In to mese-mese na'ko Noe Efrat talantia nakat nok Mesir. In of anbeti sin onle atoni anbeti ane kase fuan na'ko in sime ma in apa'.

¹³Anbi neno nane of anfu to'is a'naek neu he no'en atoni Israel ok-oke le anpolin sin neu Asyur ma Mesir. Sin of neman neu Yerusalem he naluli ma nabes neu UISNENO anbi In Tubu Knino.