Read Uab Meto YESAYA 28 Bible Online

YESAYA 28 - Uab Meto bible

YESAYA 28

¹Amle'ut neu kot le anfani neka moko neu ale amafut Israel! In mas-apinat anfani namneku onle tuna le anmaknene anbi sin a nakan. Amle'ut neu kot le ansae namnanu nesi anbi mnela alekot in atnanan, anfani neka moko neu ale atoni-atoni le anmafu anmate.

²UISNENO of ansonu atoni abe'it ma amanoet mese. In nem on nautus ul sen-sene, on ulan a'naek ma noe sako le ansako nok matani. Nok matani in neson natupa sin anbi nain.

³Neka moko na'ko ale atomatas-atomatas amafut nane of anteli naklati sin.

⁴Mas-apinat na'ko sin kot le anmaknene nane of namneku. In monin nane onle palelo fuan le namnatu nahunu na'ko tabu hen seu; leka ankiso nit fun anseu nani ma neku nani.

⁵UISNENO Akuasat Afinit of anfani hau sufa amasat le nakano nani neu In to le fe namaika sin.

⁶UISNENO of anfe tenab amneot neu ale alef lasi, ma lasi be'it ma matani neu atoni-atoni le anlek sin hen panat kot na'ko musu.

⁷Fun ale Mafefa knino ma ale Ana' fuat knino sin anmafu natuin sin ninu tua min kase nae le'uf. Sin anao anfaini'-ni' ma antofnon natuin sin tenab namle'u. Ale Mafefa knino sin ka nahin anteni fa ale mnitas le Uisneno naton nalali neu sin. Ale Ana' fuat knino sin ka nafek fa ale lasi le natiaba neu sin.

⁸Sin mei nahenu nok lo'at, talan te katit fa bale sona anteni.

⁹Sin ansakoi antom kau, nak, “In natenab nak in nanoina sekau ka? Sekau ka es hen lomi fainekat ka? In natenab nak hit fe li'ana kit le fe ansole kit ka?

¹⁰Onme in nanoina kit hanaf neu hanaf, uab neu uab, molok neu molok.”

¹¹Kalu hi kam lomi fa hem neu kau, UISNENO of ansonu atoni anao amnemat he nanoina ki uab amkakat ma a'at bian.

¹²UISNENO anlomi hen fe bale snasat neu ki ok-oke, mes hi kam lomi fa hem nen In.

¹³Es nane te UISNENO nanoina ki hanaf neu hanaf, uab neu uab, molok neu molok. Ma leka hi amnao hi ambel ma meosnom talan te hi mipap, fun him tam ambi kleot ma anheke nan ki.

¹⁴Amnen nai a'an UISNENO, hoi ale akle'at le hi miplenat to anbi Yerusalem!

¹⁵Hi miuab mak hi mo'e milali manta'en mok lasi maten ma hi mo'e milali han manba'an mok nitu sin. Hi mitenab mak lasi amle'ut le of he nem anbol nane of kan toman fa hi aom, natuin hi maiti lasi mo'el he nahafo hi aom.

¹⁶Es nane te, UISNENO Alatan Amnanut nakua a'an nak on i, “Au tao fatu mese anbi Sion fatu abe'it ma matani mese; fatu naif maupa mese nok tuis: ‘Sekau nateb nok amneot, of kan be'u fa in.’

¹⁷Lasi amneot Au mo'e ulali anfani tani su'at, ma amnonot nane Au mo'e ani anfani ab-metan tani su'at.” Ulan fatu of anpik neki ale hi lasi mo'el le hi mipestom meune. Ma noe sako of naneku nani hi bale tolo' nane.

¹⁸Hi lasi manta'en mok lasi maten ma hi han manba'an mok nitu sin of naneku nani, talan te leka amle'ut nem, hi of antali naklati ki.

¹⁹Lasi susal nukat of nem neu ki piut-piut ma neno-neno of him sutai mani, he nok-noka, he manas namtetu ma he fa-fai. Of him lilitai natuin hi mimtau leka hi mihin Uisneno In a'an.

²⁰Hi onle atoni le hen tup anbi bale tupa tuk-tuka talan te ka nenuon fa leko. In tainusat ka menuan fa neu hen tainus in aon.

²¹Fun UISNENO of anfen on anbi Tubu Perazim. In of anmabe'u on afi anbi Nonof Gibeon he nanaoba In tenab, tenab sanmakat kun neu atoni pah pinan! In of nanaoba In mepu le neki lasi amkakat.

²²Au nen ulali lasi fekat Uisneno Amnanut Afin-finit ma Akuasat Afin-finit neu he nale'un pah pinan ok-oke. Kais hi mikle'at ma miakan a'at lasi mnauba le au utiaba ani le i. Of hi misusbom anae le'uf neu he mifetin hi aom!

²³Amnen nai au hanak, ma mitnin nai au han ba'an.

²⁴Amepu lene of kan mepu fa in lene piut-piut, ka na'letu ma kan foi fa in afu neu hen sen.

²⁵Kalu in naloitan nalali in lene, in ankifu fini, ankifu sip aijob ma antao tonene. In ansen naketi ane kase huma nua, ma anbi lene in ninen in ansen luat bian.

²⁶In meput nahin, natuin Uisneno nanoina nalali in.

²⁷In kan teli fa sip aijob neki besi teli ai of kan hel fa aklet hae bubu anao natuin tonene fafon. Es nane te in anpake bale ma'kafa.

²⁸Leka in anteli ane kase, in kan beso fa piut-piut talan te namnoe nain. Kahaf! In nahin neu hen teli ane kase nok alekot es nane te in anhel aklet hae bubu anao nok fafon mes ka naskuku fa ane kase in fuan.

²⁹Lasi mahine nane nem na'ko UISNENO Akuasat Afinit. Ale lekat lulut UISNENO nahenu nok mahine ma manesa.