Read Uab Meto YESAYA 29 Bible Online

YESAYA 29 - Uab Meto bible

YESAYA 29

¹Amle'ut neu kot Yerusalem le antek nak baki tulu Uisneno! Amle'ut neu kot bale Nai Daud nasnasbon anbine! Namaut nai he nati' ton-ton anmasenu ma anmaseka nok ale in neno naek sin.

²Mes Uisneno of anfe lasi le'uf neu kot nane, talan te atoni ankae ma ansakoi. Kot ok-oke onle baki tulu le nahenu nok na'.

³Uisneno of nape' kot nane ma anfun natef kot nane na'ko bale ok-oke.

⁴Yerusalem onle kutlu' le nahelnon he naton in hanan na'ko bola' in nanan, hanaf an-ana na'ko afu nanan.

⁵Mes ale atoni anao amnemat atoni amaufinut nane of namneku on afu ai on sime le anin anfu nani. Nok askeken ma ka hinet fa.

⁶UISNENO Akuasat Afinit of nafetin kot nane neki anin slutuf ma tainunus matani. In of anfe anin slutuf ma ai le namaunu matani.

⁷Oke te ale solalus anao amnemat le he nape' Yerusalem, kot baki tulu Uisneno, al sin le anfun natef ma he nape' kot nane, of namneku on nanai anbi fai-fai.

⁸Uf-uf le nabua he nape' Yerusalem onle atoni le namnah le in namnai nak in fe nah, oke te in anfen nok in tain luman, ai onle atoni le anmeno anmate le in namnai nak in fe ninu, oke te in anfen nok po'an le anmeto.

⁹Sanmak nai piut-piut ma amtobe hi matam on atoni afolot! Amfani on atoni amafut nai, ma ka natuin fa hi minu tua min kase. Mnao nai nok amfaini'-ni' ma ka natuin fa hi mafu tua.

¹⁰UISNENO antao ma anmo'e ki hem sesa ma amtup amfini. In antobe ale Mafefa knino sin matkenu ma an amu nan amnitas amle'ut sin humkenu.

¹¹Ale lasi mnitas in otan of natolo'on neu ki, on sulat le matobe neki segel. Kalu neki sulat nane neu atoni le anso'i nahine hen so'i nani neu ko, in of na'uab nak au ka ube'i fa natuin sulat nane ma segel.

¹²Kalu neki sulat nane neu atoni le kan so'i nahin fa in of nak au ka so'i uhin fa sulat.

¹³UISNENO nakua a'an nak, “Atoni-atoni le nane sin naluli ma nabes neu Kau al neki uab ma molok, mes sin nekan na'ko na'ko Kau. Sin lasi luli besa nane lekat lulut atoni pah pinan le sin ana' nahelan.

¹⁴Es nane te of Au uskeken sin eki lasi mnesot piut-piut. Atoni mahine of sin fani amonot, ma ale sin lasi mahine of ka maota fa.”

¹⁵Amle'ut neu atoni le nahelnon he natolo' in tenab ma in ne'ob na'ko UISNENO! Sin nanaoba sin salit nane nok a'ten tena, ma sin natenab nak katit fa esle' he nit ma nahin sa' le sin antao ma anmo'e.

¹⁶Ale lasi sin eusbai nani. Me es ahunut, anmo'e nai' ai afu kele? Nabe'i ka mepu in fuan nak neu in ameput nak, “Ho es ka mo'e kau fa ka?” Ai mepu in fuan nane nak neu in ameput nak, “Ho ka mepu mube'i fa sa'-sa' es ka?”

¹⁷Anmu'i uab mnasi le nak, “Ka lo fa anteni nasi anfani lene, ma lene anfani nasi.”

¹⁸Anbi neno nane atoni atono of sin nen a'at na'ko sulat le anso'i, ma atoni afolot le afi anmoni anbi mesokan of sin nit anfani.

¹⁹Atoni-atoni amamu'it ma abaut of sin naben anteni alekot le Uisneno knino Israel anfe nani neu sin.

²⁰Nane lasi amsoput na'ko atoni-atoni le anhamu'i atoni bian ma nasi'u Uisneno. Uisneno of nale'un ale atoni asanat,

²¹atoni le anlomi hen tek nale'uf es in kanan, atoni le nakain atoni amle'ut he nati' kais nafek lasi neune, ma atoni le nauab mo'el ma poi he nati' atoni amneot kais napeni lasi amneot anbi lef lasi.

²²Es nane te UISNENO atoni Israel le nafetin Nai Abraham, In nakua a'an nak, “Au to, of ka nakle'at anteni ki fa ma hi humam of kan mutik anteni fa natuin ale lasi mae.

²³Natuin leka hi mit hi anah-anah sin le Au fe ani sin neu ki, hi of miteb mak Au le i Uisneno knino Israel. Hi of amtola Kau ma mimtausan Kau.

²⁴Atoni amnonot of nanoina he nahin ma atoni le nakunut piut of namlil hen simo noina.”