Read Uab Meto YESAYA 3 Bible Online

YESAYA 3 - Uab Meto bible

YESAYA 3

¹Namneo-namneo, UISNENO Akuasat Afinit of In naiti na'ko Yerusalem ma Yehuda ale mnahat ma mninut le sin naloitan nalali. Onane amsa ale atoni le sin napane ma nafnek neu sin:

²ale meo pa'e ma solalus, alef lasi, Mafefa knino, aban nanait ma afainekat,

³solalus nakaf, atoni atomatas, ma ana' aplenat, mnane ma anmo'e ela sin.

⁴UISNENO of naiti ale atoni munif sin he nati' sin naplenat to, ma sin of naplenat nok sin lomin kun.

⁵Atoni-atoni of sin anmahamu'in es nok es. Atoni munif of kan sian fa sin mnasi sin, ma atoni abaut of kan sian fa atoni anaet sin.

⁶Anbi neno nane atoni of anlek in biafes anah ma nak neune nak, “Al ho es a'mu'i bale pake amasat; es nane te hom fani atopus neu kai anbi batan le nahenu nok susal nukat i.”

⁷Mes in of natae nak, “Au ka mnane kau fa! Au amsa ka mu'i fa mnahat ma bale pake. Kais amlelu kau he au fani atopus neu to!”

⁸Namneo, Yerusalem anmofu nalalien! Yehuda natsel nalalien! Natuin ale sin uab sin molok ma sin taos sin mo'et sin anlaban UISNENO ma antite In kuasat.

⁹Sin monin a'moko nalile ma naton sin taos sin mo'et amle'ut. Nok mat-mat sin antao ma anmo'e sanat onle atoni Sodom anbi neno ahunut. Fun sin namle'u kun! Sin anhel ma antopu amle'ut neu sin aokenu.

¹⁰UISNENO nakua a'an nak, “Mitiaba nai neu ale atoni le na'ki neu Kau mak sin of napeni ua alekot ma aomina. Sin of anaben nit sin mepu in alekon.

¹¹Mes amle'ut neu atoni amaufinut sin! Of antao ma anmo'e sin onle sin antao ma anmo'e atoni bian.

¹²Au to of napeni hamu'it na'ko ale amnah noni mate ma ale amnah noni sufa of anmusi sin. Au nonot sin of ale sin atukus sin of nasekeb sin talantia of sin ka nahin anteni fa lanan le mes sin he nao natuin.”

¹³UISNENO naloitnon nalali neu hen tao lasi ma nafek lasi neu In to.

¹⁴UISNENO anhake on alef lasi neu ale atukus le natuku In to. UISNENO nasanab sin neki lasi i: “Hi es misik lene tua min kase sin afan; hi ume nahenu nok bale sikan le hi misik milali na'ko atoni amamu'it sin.

¹⁵Nansa' him hamu'i Au to ma misik bale' na'ko atoni amamu'it sin? Au, UISNENO Amnanut Anesit es ukua ulali Au a'ak.”

¹⁶UISNENO nakua a'an nak, “Bife-bife abit Yerusalem sin namoko'on anae le'uf fun sin anmo'eson huma-huma, sin nakbibi sin matken ma sin anao nok a'moko. Sin anse' sin haekenu anao nok huma-huma, ma bano anbi sin haekenu nahan piut-piut.

¹⁷Mes of Au kas sin; menas nok makatus of nahenu sin nakan ma of sin nakan ansuti monas.”

¹⁸Anbi neno nane UISNENO of naiti bale pake amasat na'ko bife-bife Yerusalem le sin naliatas nani esle': futu nakaf, niti haef, heke',

¹⁹niti nimaf, pilu humaf,

²⁰pilu nakaf, le'u-le'u anbi sin niman ma sin atnanan,

²¹kleli ma falo panaf,

²²bale tolas amasat leok le'uf, sobalu bet kone, tas,

²³sobalu manihis, tais muti leko, sobe ma tainusat fafon le namnanu.

²⁴Neno i sin anpake fomeni ma fobona, mes of sin nafo, fo punu. Sin pasu futu alekot of anseka sin neki pasu futu amle'ut. Sin bale pake alek-lekot of anseka sin neki bale pake kloef. Neno le i sin human namas mes neno amnemat sin human of namle'u natuin of anmalak sin.

²⁵Ale atoni abe'it ma matani of sin anmate anbi makenat.

²⁶Of atoni ankulu ma ankae anbi kot in eno sin, ma kot le nane of onle bife le antoko monas anbi afu.