Read Uab Meto YESAYA 30 Bible Online

YESAYA 30 - Uab Meto bible

YESAYA 30

¹UISNENO nakua a'an nak, “Amle'ut neu ale ana' aplenat Yehuda, natuin sin anlaban Kau. Sin natuin ale sin tenab ma sin salit le ka Au tenab ma ka Au salit fa. Sin antao ma anmo'e lasi manba'an le nasuli nok Au lomik. Onane te sin sanat nahenu ma natupu.

²Sin anao neu Mesir mes sin kan toti fa Au lomik. Sin namaoftok neu Mesir ma nafek neu Kesel Mesir hen bab sin.

³Mes kesel nane mes namenab sin nekenu, ma lasi neot ma le sin napane ma nafnek na'ko Mesir of luman.

⁴Fun maski ale haef na'ko Yehuda sin anao ma ante nalali Zoan ma Hanes anbi Mesir,

⁵mes ale atoni of sin anmae natuin sin napane ma nafnek neu uf le ka maota fa neu sin. Le sin napeni nane ka lasi mnisat fa ai tuntakus, mes lasi si'ut.”

⁶Han ba'an UISNENO antom mu'it-mu'it le natua pah bian a'ne'u nak on i, “Sin haefen le ansonu sin nasaeba sin atnatas neu bikase luke mnanu ma neu bikase paha snaen, oke te anao nok bale le nahenu nok lasi maten natuin bale nane nahenu nok meo asu, koko, ma kaun koko manine. Ale sin atnatas nane sin natulu neu uf le kan fe fa tuntakus ma babat neu sin.

⁷Babat na'ko Mesir luman kun. Es nane te Au ukanab Mesir ak, ‘Kaun koko atpenes le ka neki fa maten’.”

⁸Uisneno anlelu kau he tui sanat na'ko In to anbi sulat mese anfani on lasi mnaut talan nabal-bal.

⁹Natuin, sin le nane uf mese le anlomi hen laban Uisneno, anlomi he anmo'e ma kan lomi fa he nen noina UISNENO.

¹⁰Sin nak neu ale Mafefa knino nak, “Amtobe hi fefam! Kais miton neu kai sa' le ka namneo fa, mes sa' le hai amlomi he mitnin. Mifetin kai he hai mitenab kim.

¹¹Ambeo nai mi'ko lanan, ma amnao nai mok lanan bian. Kais moki kai meki Uisneno knino Israel.”

¹²Es nane te Uisneno knino Israel nakua a'an nak on i, “Him tite Au a'ak ma him sonlaitom meu lasi hamu'it ma lasi mo'el.

¹³Es nane te hi misanab. Hi onle baki lape mnanu le anpe' na'ko fafon talan te pinan; of nok askeken hi mitsel.

¹⁴Hi of miskuku onle nai' afu le anpe' ansiksakenon talan te na'ko in pisa sin le nane ka tapeni fa neu he taiti ai flae na'ko tunaf ai neu het sote oe na'ko bale nifu.”

¹⁵UISNENO Anesit Afinit, Uisneno knino Israel, nakua a'an neu In to nak, “Mite'un nai ma amtainine nai piut, ma of Au ufetin ki. Miteb nai neu Kau nok nek alekot, ma of Au uhelan ki.” Mes hi kam lomi fa!

¹⁶Mes hi mitenab milalien he nati' hi maen mi'ko musu meki bikase le naen nok matani. Leko! Namneo hi of mes he maen! Hi mitenab mak hi bikase naenat matani, mes ale ali'ut le anli'u ki sin manoeken matani nesin ki.

¹⁷Atoni nifun mese of sin naen leka atoni mese na'ko musu ansali sin, ma hi maen oke leka atoni nim ansali ki. Na'ko hi solalus sin al ni pen-pene mese es anhake nabalah anbi tubu tunan.

¹⁸Maski onane, UISNENO anpao In tabu neu he nalile In manekan neu ki. In naloitan ma nabalab neu he nek ma namnau ki. Natuin UISNENO In kun le anmo'e sa' le antom. Ua alekot neu atoni le nafnek neu In.

¹⁹Hoi hi le mitua anbi Yerusalem, of hi kam kae fa piut. UISNENO In anmu'i lasi amnaut, ma of In natae ki lab-labah leka kalu him sakoi ma amtoti babat na'ko In.

²⁰UISNENO anfe neu ki tabu su'at le mafena neu he nanoina ki. Mes muni i In anhake nok ki talan te him naben In nok ki.

²¹Leka him beo mi'ko lanan, of In haman ki na'ko hi kotim nak, “Lanan es i; mituin nai lanan le i.”

²²Hi le'u mahuma le makuni ma mapeni nok noni muti ma noni mnatu of him polin sin onle maklafu, ma hi mak, “Amnao nai mu'ko kau!”

²³Leka kalu him kifu fini, UISNENO of nasanut ulan he nati' fini nane anmoni ma napoitan abut le nathoe nok matani. Neu hi mu'it sin of anmu'i mnela hu mate naek neu sin.

²⁴Bijae keso ma bikase luke mnanu le anbet ane oek of sin nah mnahat leko le'uf le naloitan ma nabalab nateta nani.

²⁵Anbi neno nane kot-kot na'ko hi musu sin an amu nan sin ma anlolo namate sin tuaken, tubu mese-mese ma neten mese-mese of noe ana anpoi na'ko sin.

²⁶Funan in meusinen le nane of on manas, ma manas nane in pinan of no hitu ma nesi na'ko in pinan, on meusine neno hitu nabuab nani sin anfani mese. Ale lasi nane of anbol anbi neno UISNENO an amu ma naleko ale papa' na'ko In to le In ankas nalali sin.

²⁷UISNENO In kuasat ma In apinat nem na'ko lo. Ai ma masu naton In to'as. In namolok nok sin, ma In molok nane notu sin onle ai.

²⁸In anlelu anin naen nahunun In on noe sako ansae ante neon ma naneku nani ale sa' oke. In nale'un ale uf-uf, ma an eka sin tenab amle'ut.

²⁹Mes hi, to Uisneno, of hi mimlil ma amsi on anbi fai hi miliatas lasi knino. Hi of mimlil ma mimoke on atoni nabso' natuin bobi hanan anao neu Ume UISNENO, apesit Israel.

³⁰UISNENO of nanenab In hanan alatas, ma of es-es in naben In kuasat matani. In to'as of neki ai ma notu nani ale sa', ulan a'naek, ulan fatu ma anin slutuf.

³¹Atoni Asyur of naskek leka sin nen UISNENO In hanan ma naben In kasat le mafena.

³²Leka sin fe naben In kasat, UISNENO In to namlil ma namoke neki sit, heo ma bijola. Uisneno of In neknon kun anmaken ma anlaban atoni Asyur.

³³Na'ko afi un-unu naloitan nalali bale mnotu neu kesel Asyur. Bale nane mnanu ma meunuan, nahenu nok hau mnotu le na'tupu anfin-fini. UISNENO of napena nani neki In snasan on noe ai.