Read Uab Meto YESAYA 32 Bible Online

YESAYA 32 - Uab Meto bible

YESAYA 32

¹Amkiso nai, of in neno ante kesel mese of naplenat nok amneot ma ale atopu to sin nanaoba lasi amneot.

²Sin mese-mese onle bale neot ma hafot na'ko anin ma oki. Sin on noe le ansai anbi mnela snaen, on fatu pesit a'naek anbi nain ametos.

³Atoni le sin nit of kan tobe fa sin matan, ma le sin nen of sin anpanat.

⁴Atoni le afi ahunut sin nekan tuk-tuka of nanaoba ale sa' nok neka none ma nok nek mahine. Atoni amonot sin of namolok nok alekot.

⁵Atoni amonot of kan tek fa sin nak makana, ma anmo'e poi sin of kan tek fa sin nak amneot.

⁶Atoni amonot na'uab lasi mono ma natenab lasi amle'ut. Sa' le sin anmo'e ai le sin na'uab anfani lasi si'ut neu Uisneno. In kan hao nit fa atoni le namnah ai kan fe nit fa mninut neu atoni le anmeno.

⁷Ma atoni anmo'e poi natenab ma anmo'e lasi amle'ut. In nami al amle'ut neu he nale'un atoni amamu'it neki uab poi ma nakain sin he napeni sa' le sin in-ini.

⁸Mes atoni nek alekot natenab lasi-lasi alekot ma nanaoba lasi-lasi alekot amsa.

⁹Amnen nai, hoi bife le hi moni nok alekot, le hi mifetnom na'ko lasi susal.

¹⁰Neno le i him naben tainine, mes oni al ton mese anteni hi nekam of na'unu, natuin hi tua min kase in fuan of luman, ma pah in afan bian amsa of katit fa.

¹¹Talan te neno i hi moni nok alekot, hi mifetnom na'ko susal. Mes tabu i, amlilitai nai nok amtaus! Amkasu mipoitan hi bale pake sin ma amfutu hi atnanam meki kalo.

¹²Amkae nai neu ale hi lene sin le maafa ma hi lene tua min kase le nafua nok matani,

¹³natuin Au to sin lene kisan ma kasunat anmoni natau nani. Neu, him kae nai neu hi ume-ume sin bale atoni namlil ma namoke anbine ma kot le nahenu nok amlilat!

¹⁴Mes na'ko nane of hi maen misaitan sonaf ma kot ainaf amlilat of tena maten. Tubu ma ale el fatu paot nanel nalali sin nok nain talan te nabal-bal. Ale bikase luke mnanu fui ma ale bibi kase of natua ma neku hun anbi nane.

¹⁵Mes hae es anteni Uisneno of In koenon nem nok In kuasat. Ma mnela hufui of anfani lene-lene maafa, ma lene-lene sin of anfani nasi.

¹⁶Anbi pah ok-oke of anmu'i lasi amneot ma amnonot.

¹⁷Es-es of anmo'e lasi amneot, talan te anmu'i lasi alekot ma tainine talan te nabal-bal.

¹⁸To Uisneno of nafetnon na'ko susal ma anmoni anbi bale halan ma tainine.

¹⁹Aomina ma ao leko neu ki oke natuin oe of nathoe neu ki neu hi mana' ma hi luat sin, ma hi mu'it neku hun anbi me-me nok tainine. Mes hi musu sin of onle lasi le ul fatu antoman ma sin kot of natsel nani kun.