Read Uab Meto YESAYA 33 Bible Online

YESAYA 33 - Uab Meto bible

YESAYA 33

¹Amle'ut neu hit musu-musu sin! Sin nasik maski es ka nasik fa sin, ma sin an aneb maski es kan aneb fa sin. Mes leka sin nasik ma an aneb nalali, sin amsa of nasik sin ma an aneb sin.

²Koi UISNENO, amnek ma mumnau kai fa. Hai mipane ma mifnek neu Ko. Muneo ma muhafo kai na'ko neno es neu neno es ma mufetin kai anbi neno hai ambi susal mafena.

³Kalu Hom fen ma munenab Ho hanam on anin slutuf, of uf-uf sin naen nasaitan ma nasanon.

⁴Fun on fokat pukan mese atoni mes nape' ma nasik nan sin a'maus.

⁵UISNENO amneot ma amnonot, In akuasat neu ale sa'-sa'. In of nahakeb lasi amneot ma amnonot anbi Yerusalem

⁶ma anfe lasi halan ma tainine neu In to. Maus le nafetin sin esle' nek manoe ma mahine ma lasi tola neu UISNENO.

⁷Atoni-atoni abe'it ma matani ankoa ma antoti babat ma tuntakus; ale haef halan pah le nahelnok neu lasi halan sin ankae nok nek susal.

⁸Ale lan opat nahenu nok lasi maten talan te mnino maten; katit fa es he nao nokan. Nasuan han manta'en ma antite han bela. Kait fa esle' hen kiso sin.

⁹Sin nasaitan pah ma anfani tena maten. Nasi-nasi anbi Libanon anmasil, ma mnela Saron le maafa anfani on mnela hufui. Anbi Basan ma Tubu Karmel sin hau no' sin natkua.

¹⁰UISNENO nakua In a'an neu In to sin nak, “Au of a'fen ma uton Au kuasat.

¹¹Hi salit nane luman kun, ma ale sa' le hi mo'e ka maota fa. Hi taos nane onle ai le nale'un hi aom.

¹²Hi onle fatu putun le notu hen fani ao; onle kisan ma kasunat le an ote ma notu nani anbi ai.

¹³Maut he ale atoni a'lot ma anhaumakat sin nen neu Au taos ma sin ansimo Au kuasat.”

¹⁴Atoni-atoni anbi Sion anlilitai nok amtaus. Sin nak, “Lasi fekat Uisneno on ai le anpin talan te nabal-bal. Nabe'i ka es anhake nabalah anbi ai le he nale'un nane?”

¹⁵Hi nabe'i amhake mibalah kalu hi miuab ma mo'e lasi amneot. Kais mami mnisat nok minisi atoni amamu'it, ma kais amsimo noni mate. Kais amnao mituin atoni le ansali he namate atoni ai lasi amle'ut bian.

¹⁶Of namafo ki ma hi amtainine, onle hi moni ambi kot matani in nanan. Mnahat ma mninut naloitnon neu ki.

¹⁷Anbi neno nane hi of amkiso mit kesel mese le naplenat nok alekot neu pah menuan ok-oke.

¹⁸Hi lasi mtaus neu afi asimo noni poni, ana' aplenat ma apaot anao amnemat al anfani lasi nu'un.

¹⁹Hi of ka mit amteni fa atoni-atoni anao amnemat amle'ut le nauab neki a'at le hi ka mihin mani fa.

²⁰Ambaisenu nai neu kot Sion, bale hit taliatas tolas lasi knino. Amkiso nai Yerusalem! Bale nane antainine naek neu he tatua atbine, onle um-ume le ka tatnanib fa, in a'suak kat bok tabe'i fa ma in tani ka natfek nit fa.

²¹UISNENO of In naton In apinat neu kit. Hit of atmoni atbi noe ninen le menuan, le katit fa bnao musu le he nao nokan.

²²Sin bale makenat anbi sin abnao ka maota fa; ma sin pilu anin of ka natpu' fa! Ale amaus na'ko musu in solalus sin of hit tasik tani, ma amfaune anae le'uf, talan te atoni a'lot sin amsa napeni pa'. UISNENO In kun of anfani kesel neu kit; In of naplenat, nahakeb lasi amneot, ma nafetin kit na'ko musu.

²⁴Katit fa es amsa anbi hit pah le hen sakoi natuin menas, ma ale hit sanat sin of ansako nani sin.