Read Uab Meto YESAYA 34 Bible Online

YESAYA 34 - Uab Meto bible

YESAYA 34

¹Aim nai mibua, hoi uf-uf, ma amnen nai. Maut nai pah pinan ok-oke ma ale amonit anbine ok-oke aim ma amnen nai.

²UISNENO nato'an ale uf-uf ma ale sin solalus sin. In of ankas ma nale'un sin.

³Sin aon nitu of kan sub fa sin, mes anpolin sin onle nane he nati' anpunu ma nafo. Tubu-tubu of me' natuin sin na' ansai on noe sako neu sin.

⁴Manas, funan, ma ale afkun of namnoe nain. Neno tnanan of anunu nani onle atnunu sulat. Ale afkun of anmofu onle hau no' anmofu na'ko hau.

⁵UISNENO naloitan nalali In suni anbi neno tunan, ma suni nane of nale'un pah Edom le nafek nalali kasat neu in ma of nale'un nani.

⁶Suni UISNENO of nahenu nok sin na' ma nahenu nok sin balun, papmese nok na' ma baluf mu'it fua mnotu. Natuin UISNENO naloitan fua tulu anbi Bozra, ma In anmo'e malolot anaek anbi pah Edom.

⁷Atoni-atoni of anmate onle bijae fui ma bijae tipu. Sin pah of me' nok na' ma nahenu nok baluf.

⁸Nane neno UISNENO anpesi Sion ma anseunbanin In to'as neu In musu-musu sin.

⁹Noe Edom sin of nabaina ma anfani oe metan makli'at, ma sin anfani ai flae. Ma oke te pah ok-oke anputu on oe metan makli'at.

¹⁰Fai manas in pinan nane kan mate fa, ma in masun ansae na'kone talan te nabal-bal. Sin of nasaitan pah nane talan te luman ma anhufui anmate na'ko batan talan te batan, ma katit fa esle' he nao nokan.

¹¹Kol bako ma kol isu of natua anbine, kutlu' ma kol ka' of natua anbi nane. UISNENO anmo'e pah nane nasitbon ma luman onle nahunun fe kan fatau fa pah pinan.

¹²Katit fa kesel le he naplenat pah nane, ma ale sin atopus sin namneku nalalien.

¹³In sonaf ma in kot kisan ma kasunat ma hun of anmoni anbine, ma meo asu ma kol fui of natua anbine.

¹⁴Mu'i fui amaunut of naoinson anbine, kutlu' sin han kenu anmasimon es nok es, ma kutlu' fai nami bale he nasnasbon.

¹⁵Anbi bale nane kaun koko le'uf antao in kuna anbine ma nateko, ma nu'u in teko, ma anpanat in ana sin. Ma kol teme abnakot nabuan anbine pasnes nok pasnes.

¹⁶Mami nai ma amso'i nai anbi A'an Knino UISNENO: Katit fa es amsa na'ko ale amonit nane he namneku ai pasnes he namneku na'ko pasnes. Natuin UISNENO naplenat onane, ma In anmeskun es nabuab sin.

¹⁷UISNENO es anbati pah nane neu sin ma es-es ansimo in-ini. Sin of natua anbi nane talan te nabal-bal, ma pah nane anfani sin ini na'ko batnes neu batnes.