Read Uab Meto YESAYA 35 Bible Online

YESAYA 35 - Uab Meto bible

YESAYA 35

¹Mnela hufui ma mnela snaen of sin namlil, ma tuna-tuna anbo anbi mnela hufui.

²Mnela hufui anfenus ma anmenua anae le'uf, ma nabso' nok sit-sit alekot. In masan on Tubu Libanon, ma in lekon on mnela Karmel ma mnela Saron. Es-es of nit kuasat UISNENO, ma hit Uisneno In apinat.

³Mihelan nimaf le an ole, mimepan hi tum le na'tai.

⁴Miton nai neu nek ana'-ana' sin mak, “Mihelan hi nekam nai, kais hi mimtau, hi Uisneno In nem hen kas hi musu sin, In nem he nafetin ki.”

⁵Anbi neno nane atoni matfolo of nabe'i sin nit, ma atoni atono of nabe'i sin nen.

⁶Atoni men ole anokalua'on on lus, atoni amonot naba' nok amlilat. Natuin oe mat honis anbobok anbi snaen, ma noe ansai anbi hufui.

⁷Snaen maputu of anfani nifu, nain ametos of anfani oe mata honis. Bale le asu fui natua anbine, niupsai ma ekam of anmoni anbine.

⁸Anbi nane of anmu'i lan opat, “Lanan anao neu honis ma aomina” in kanan onle nane. Atoni asanat ka nao nok fa lanan nane, atoni amonot ka nasekeb fa atoni le anao nokan.

⁹Anbi bale nane kan mu'i fa meo asu, ai mu'it amaunut bian katit fa anbine. Atoni-atoni le UISNENO nafetin sin anao nok bale nane.

¹⁰Atoni-atoni le UISNENO napoitan; sin of sin neki anfani; sin antaman neu kot Yerusalem nok a'baf, sin humken namlil natuin amlilat amoket nabal-bal. Sin of namlil ma namoke; susal ma sakoit namneku nalalien.