Read Uab Meto YESAYA 36 Bible Online

YESAYA 36 - Uab Meto bible

YESAYA 36

¹Anbi ton bo'es am ha Nai Hizkia Kesel Yehuda in nanaoba plenat, kot-kot Yehuda, le mabaki lape Nai Sanherib, kesel Asyur, in nem nape' ma anbe'u nani.

²Oke te in ansonu in nakaf makenat amnanut na'ko Lakhis nem neu Yerusalem neki solalus amfau le'uf ma naseke Kesel Nai Hizkia he nati' nana'ton. Sin nem ante kot nane ma sin anhake anbi bale le antek nak Bale Hoi Kloe, anhaumak oe sain le ansai na'ko nifu fafon.

³Oke te ameput tenu na'ko Nai Hizkia anpoi nem natef nok nakaf makenat Asyur. Ameput tenu en nane es Nai Elyakim Nai Hizkia anmone nakaf apao sonaf, Nai Sebna lultunis pah ma Nai Yoah Nai Asaf anmone lultunis sonaf.

⁴Nakaf makenat amnanut Asyur nak neu sin nak, “Mison nai neu Nai Hizkia, uab kesel Asyur le i, ‘Nansa' hom naben ho aom abe'it ko ka?

⁵Ho mak al uab nabe'i anseka lasi hinet ma be'it matani solalus? Hom sonlaitom meu sekau talan te ho hem laban Asyur?

⁶Namneo ho mufnek neu tuntakus Mesir, mes le nane onle hun in ta'un le hom pake ma anfani tias, — mes tias nane of nat'ipu ma ho nimam of napaunon neune. Onle nane Kesel Mesir neu atoni le sin nafnekan neu in.’ ”

⁷Oke te nakaf makenat Asyur nauab anteni nak, “Ai ho mak hi mifnekan neu UISNENO hi Uisneno ka? Anbi tabu Nai Hizkia naplenat he nati' atoni Yehuda ma Yerusalem al nabes anbi baki tulu anbi Yerusalem, ai le nale'un sin le nane ka baki tulu fa ma ka bale-bale luli besa fa neu UISNENO ka?

⁸Es nane te au on kesel Asyur in nakaf makenat hit atmapasan nai, kalu au fe ki bikase nifun nua, hi of ka mu'i fa atoni amfaun onle nane neu hen sae neu sin.

⁹Neu hi hem laban nakaf makenat abaut na'ko Asyur amsa hi kam laban mibe'i fa. Maski onane amsa hi mifnekan Mesir hen sonu ki tuntakus aklet makenat ma solalus asae bikase!

¹⁰Hi mak hai mipe' ma ambe'u hi pah ka natuin fa babat na'ko UISNENO ka? UISNENO anmeskun es anlenu kai he mipe' ma mile'un mani”

¹¹Oke te Nai Elyakim, Nai Sebna ma Nai Yoah nak neu nakaf makenat Asyur nane nak, “Usi, mumolok mok kai meki a'at Aram, fun hai mihin. Kais meki a'at Ibrani, natuin to atokos lape kot tunan of sin nahinan.”

¹²Nakaf makenat Asyur nane natae nak, “Ai al neu ki ka ma hi kesel ka onane te kesel Asyur ansonu kau he utiaba neu ki ale lasi i ok-oke? Au amsa umolok neu to atokos lape tunan nane, he nati' sin nah sin maklafu nok ki ma ninu sin mi nok ki.”

¹³Oke te nakaf makenat nane anhake ma ankoa neki a'at Ibrani nak, “Him nen nai kesel Asyur in hanan,

¹⁴‘Kais amlomi he Nai Hizkia anmo'e ki! In mes ka nafetin nan ki fa!

¹⁵Kais him nen in fulit he mifnek neu UISNENO. Kais hi mak UISNENO of nafetin ki ai nakain solalus Asyur he kais nasik hi kot.

¹⁶Kais him nen Nai Hizkia! Au kesel Asyur kau au es ak neu ki he nati' him poi mi'ko hi kot ma mina'tom meu kau. Of nabe'i hi miah hi tua min kase in fuan na'ko hi lene kun, ma of hi miah hi plelo aem in fuan na'ko in un ma hi minu oe na'ko hi oe mata,

¹⁷talan te au utnanib ki neu pah mese le ala kle'ot papmese onle hi pah. Anbi nane anmu'i lene tua min kase le hi mipeni tua min kase na'kone, ma lene ane kase le hi mipeni ut he miah.

¹⁸Kais him nen Nai Hizkia! In al anfuli ki neki molok nak UISNENO of nafetin ki. Ai anmu'i ka uisneno teta na'ko pah mese he nafetin in pah na'ko au kuasat?

¹⁹Pah Hamat ma Arpat sin uisneno teta es me ka? Pah Sefarwaim sin uisneno teta es me ka? Ai anmu'i le nem he nafetin Samaria ka?

²⁰Uisneno teta me ka nabe'i nem he nafetin in pah na'ko au kuasat? Nabe'i ka UISNENO nafetin Yerusalem!’ ”

²¹Leka sin nen onane, tuafen Yerusalem ka natae fa, natuin Kesel Nai Hizkia naplenat sin he nati' kais sin natae.

²²Nai Elyakim, Nai Sebna ma Nai Yoah anpisu sin bale pake anfani taka' nek susal, oke te sin anao neu kesel ma naton sa' le nakaf makenat Asyur naton neu sin.