Read Uab Meto YESAYA 37 Bible Online

YESAYA 37 - Uab Meto bible

YESAYA 37

¹Leka Kesel Nai Hizkia in nen lasi tonas na'ko atoni tenu en nane, in anpisu in bale pake ma anpake kalo anfani taka' nek susal, oke te in anao neu Ume UISNENO.

²Oke te in ansonu Nai Elyakim apao sonaf, Nai Sebna lultunis pah, ma ale Ana' fuat knino le sin anao he natef nok Mafefa Knino Nai Yesaya, Nai Amos anmone. Fun sin amsa anpake kalo.

³I a'at na'ko Nai Hizkia le sin natiaba neu Nai Yesaya nak, “Neno i neno susal nukat; fun ankas kit ma nasi'ut kit. Hit onle bife le he nahoni, mes kan mu'i fa nenuf.

⁴Kesel Asyur ansonu nalali in nakaf makenat amnanut neu he nakle'at Uisneno amonit. Sekau nahin oni UISNENO In nen nalali kle'at nane ma of ankas sin le sin namolok onle nane! Es nane te amonen toti nai neu Uisneno antom hit atoni-atoni sin le fe anmoni.”

⁵Leka in ansimo nalali a'at na'ko Kesel Nai Hizkia nane,

⁶Nai Yesaya in anlelu haefen nane he natiaba han taes i nak, “UISNENO nakua a'an, ka nabe'i fa usi ho mumtau leka hom nen uab-uab na'ko ate-ate kesel Asyur nane le sin nak UISNENO of ka nafetin nan kit fa.

⁷UISNENO of anmo'e kesel Asyur talan te in nen kun lasi anin mese oke te in anfani neu in pah, ma of namate in anbi nane.”

⁸Nakaf makenat Asyur nane in napeni hanaf nak in kesel anao nasaitan Lakhis ma anmaken anlaban kot Libna, ka lo fa na'ko nane. In anao neu bale nane he natef nok in kesel.

⁹Kesel Asyur in ansimo nalali hanaf nak solalus Mesir le Nai Tirhaka anfani nakaf neu sin na'ko Sudan sin nem hen maken nok sin. Es nane te, kesel Asyur anfe sulat neu Nai Hizkia, kesel Yehuda.

¹⁰Sulat nane in hanan nak on i, “Kais anfuli ko natuin manba'an Uisneno le hom sonlaitom meune nak of ho ka mofu fa ambi au nimak.

¹¹Hom nen mulali nak ale pah le ale kesel Asyur nape' sin naskuku nani sin ok-oke. Kais ho mutenab mak ho mes mufetnom.

¹²Anbi neno au mnasi sin nale'un kot Gozan, Haran ma Rezef, ma namate atoni-atoni Eden, le natua anbi Telasar, katit fa uisneno teta mese na'ko sin he nafetin sin.

¹³Ale kesel kot Hamat, Arpad, Sefarwaim, Hena ma Iwa sin es me ka?”

¹⁴Nai Hizkia in ansimo sulat nane na'ko haefen ma anso'i. Oke te in anao neu Ume UISNENO ma in nauf sulat nane anbi UISNENO In human,

¹⁵ma in onen toti, nak,

¹⁶“Koi UISNENO Akuasat Afinit, Uisneno atoni Israel, le amtunom ambi ahake neno tunan sin atnanan, Ho mese kum Uisneno neu ale plenat pah pinan. Fun Ho es anmo'e neno tunan ma pah pinan.

¹⁷Koi UISNENO, amkiso kai nai natuin sa' le anbol antoman kai. Amnen nai ale si'ut Sanherib neu Ko, Uisneno honis.

¹⁸Hai al-al kai mihin, koi UISNENO, nak ale kesel Asyur nale'un nalali pah namfau ma naskuku nani sin ok-oke.

¹⁹Ale sin uisneno teta amsa notu nani sin ma naskuku nani sin, natuin namneo-namneo sin uisneno teta sin kan mu'i fa kuasat. Sin al le'u mahuma na'ko hau ma fatu pakae nimaf atoni pah pinan.

²⁰Koi, hai UISNENO, mufetin kai fa na'ko atoni-atoni Asyur nane, he nati' ale uf-uf anbi pah pinan nahin namneo-namneo nak Ho UISNENO Ko Ho mese kum.”

²¹Oke te Nai Yesaya ansonu han ba'an neu Kesel Nai Hizkia on han taes neu kesel in onen totis,

²²nak UISNENO nakua a'an, “Kot Yerusalem anmanis ko ma nasi'u ko, Sanherib!

²³Ho ka muhin fa neu sekau ka esle' ho muakan ma musi'u nane? Au, Uisneno atoni Israel, Uisneno knino knao matani.

²⁴Hom sonu ho haef sin ma nauab anmo'e nak ho meki ho aklet makenat namfau, hom sae mumtetu nuaf-nuaf amnanut tunkenu anbi Libanon. Ho mumoko'om mak ho mufae mulali aijob le amnaun le'uf ma mas le'uf, ma hom taman ale nasi makono matain le'uf.

²⁵Ma ho munaebom mak hom hani oe mata ma minu oe ambi pah-pah bian, ma ale ho solalus sin anteli naklati Noe Nil talan te anmeto.

²⁶Ai ho fe kam nen mit fa ka nak ale nane Au uhakeb ulali na'ko ahunut? Es nane te neno i Au unaoba ani. Au es a'fe neu ko kuasat he mule'un kot-kot baki malape hen fani fatu tutnae.

²⁷Atoni-atoni le sin natua anbi nane ka nahoten fa; sin naskek ma namtau. Sin onle hun anbi mnela ai onle naba le anmoni anbi ume tefin, le anmeto leka anin maputu na'ko neno saen anfu.

²⁸Mes Au uhin lasi ok-oke antom ho aom. Au uhin sa' le ho mo'e ma Au uhin neu ho hem nao meu me. Au uhin nak ho muto'an Kau nae le'uf,

²⁹ma Au nen ulalien neu ho taos ma ho mokom nane. Es nane te Au tao besi li'ak anbi ho panam ma kablesu neu ho fefam, he Au hel ko amfani meu ho pah amnao mok lanan le afi ho amu amnao mokan.”

³⁰Nai Yesaya amsa ansonu han ba'an i neu Nai Hizkia nak, “Le hen fani taka' neu ko esle' i. Ton le i ma ton amnemat es-es of nah ane kase le anmoni anmese kun anbi lene. Mes namuni na'ko nane te sin nabe'i ansen ane kase ma tua min kase oke te sin nah in fuan.

³¹Atoni Yehuda le anmoni of sin namlia on luat le in a'ba'an nane antam amnanu oke te napoitan fuan.

³²Anbi Yerusalem ma anbi Tubu Sion in tunan of anmu'i atoni-atoni le napeni honis, natuin UISNENO Akuasat Afinit anlek nalali nak lasi nane of anbol.

³³UISNENO nakua In a'an neu kesel Asyur nak on i: ‘In of kan tam nit fa neu Yerusalem ma of ka naklaon nit fa as'anef mese neu kot nane. Ma ale solalus le anpake bale makenat katit fa es hen haumak kot nane, ma le anfun natef kot nane of ka nafena nit fa bale pesit neu makenat.

³⁴Kesel Asyur of anfani neu in pah anao nok lanan le afi in nem nokan, ma kan tam nit fa neu kot nane. Au, UISNENO Kau, Au ukua ulali Au a'ak.

³⁵Kot Yerusalem of Au pesi ma umafo natuin Au apinat ma natuin Au lasi manba'an nok Au ate Nai Daud.’ ”

³⁶Ma anbi fai nane amsa ahake UISNENO nem neu um-ume atoni Asyur ma namate solalus atoni 185.000. Noka fa onane ale aon nitu solalus amates sin nane anpoilnon anbi nane.

³⁷Onane te Nai Sanherib, kesel Asyur antet koti ma anao anfani neu Niniwe.

³⁸Nak anbi neno mese te leka in fe naluli ma nabes anbi ume le'u Nisrokh, in uisneno teta, onane te in anmone sin Nai Adramelekh ma Nai Sarezer anote namate in neki suni. Oke te sin naen neu Ararat. Ma Nai Esarhadon in anmone ansae kesel anseka in.